13-Feb-2025

ବରଗଡ଼:(ନିରଞ୍ଜନ ତ୍ରିପାଠୀ)-  ବହୁ ପ୍ରତିକ୍ଷାର ଅନ୍ତ ଘଟାଇଛନ୍ତି ରାଜ୍ୟ ସରକାର । ପ୍ରମାଣ କରିଛନ୍ତି ଏଥର କେବଳ ସହର କିମ୍ବା ଉପକଣ୍ଠ ନୁହେଁ ଗ୍ରାମାଞ୍ଚଳର ପର୍ଯ୍ୟଟନ କ୍ଷେତ୍ର ମଧ୍ୟ ବିକଶିତ ହେବ । ବିକାଶର ଛାପ ପୁରପଲ୍ଲୀରେ ମହକି ଉଠିବ । ବର୍ଷ ବର୍ଷ ଧରି ଚାତକ ପରି ଚାହିଁ ବସିଥିବା ଭଟଲି ବାସୀଙ୍କୁ ମିଳିଛି ଅପୂର୍ବ ସଫଳତା । ବାରମ୍ବାର ସରକାରଙ୍କ ଦୃଷ୍ଟିକୁ ଅଣାଯାଉଥିଲେ ସୁଦ୍ଧା କୌଣସି କାରଣରୁ ଏହା ସମ୍ଭବ ହେଉନଥିଲା । ତଥାପି ବିଳମ୍ବରେ ହେଉ ପଛେ ସରକାର ଏହାକୁ ବିଚାରକୁ ନେଇ ପର୍ଯ୍ୟଟନ ସ୍ଥଳୀର ମାନ୍ୟତା ଦେଇଛନ୍ତି । ଏନେଇ ମଙ୍ଗଳବାର ରାଜ୍ୟ ସରକାର ସାରା ରାଜ୍ୟରେ ୨୦ଟି ପର୍ଯ୍ୟଟନ ସ୍ଥଳୀକୁ ସରକାରୀ ମାନ୍ୟତା ପ୍ରଦାନ କରିଛନ୍ତି । ଏନେଇ ଓଡ଼ିଶା ରାଜ୍ୟ ପର୍ଯ୍ୟଟନ ବିଭାଗ ବିଜ୍ଞପ୍ତି ମଧ୍ୟ ଜାରି କରିଛି । ଏହି ମର୍ମରେ ବରଗଡ଼ ଜିଲ୍ଲାର ୩ଟି ପ୍ରମୁଖ ପର୍ଯ୍ୟଟନ ସ୍ଥଳୀ ସ୍ଥାନ ପାଇଥିବାବେଳେ ଭଟଲି ବିଧାନସଭା ନିର୍ବାଚନ ମଣ୍ଡଳୀ ଅନ୍ତର୍ଗତ ଅମ୍ବାଭୋନାର କେଦାରନାଥ ମନ୍ଦିର ଏବଂ ଭଟଲିର ଶ୍ରୀ ଶ୍ରୀ ଦଧିବାମନ ମନ୍ଦିର ସ୍ଥାନ ପାଇଛି । ଏଥିପାଇଁ ସ୍ଥାନୀୟ ବାସୀନ୍ଦା ମୁଖ୍ୟମନ୍ତ୍ରୀ ମୋହନ ଚରଣ ମାଝି, ପର୍ଯ୍ୟଟନ ମନ୍ତ୍ରୀ ପ୍ରଭାତି ପରିଡ଼ା ଏବଂ ଭଟଲି ବିଧାୟକ ଇରାସିସ୍ ଆଚାର୍ଯ୍ୟଙ୍କ ଧନ୍ୟବାଦ ଜଣାଇଛନ୍ତି । ଏକଦା ଉଭୟ ପର୍ଯ୍ୟଟନ ସ୍ଥଳୀ ସରକାରୀ ଉଦାସୀନତାର ଅଭାବ ଯୋଗୁ ଅବହେଳିତ ଅବସ୍ଥାରେ ପଡ଼ିରହିଥିବାବେଳେ ଏହି ଘୋଷଣା ପରେ ଅଞ୍ଚଳ ସମଗ୍ର ରାଜ୍ୟ ତଥା ଦେଶରେ ପ୍ରସିଦ୍ଧି ଲାଭ କରିବ ବୋଲି ଆଶା ବାନ୍ଧିଛନ୍ତି । ପ୍ରକାଶ ଥାଉକି ପ୍ରାୟ ୧୬୧୭ ମସିହାରେ ସମ୍ବଲପୁର ରାଜା ବଳିୟାର ସିଂଙ୍କ ରାଜତ୍ୱ କାଳରେ ବିଭୁଭକ୍ତ ପରମାନନ୍ଦ ଭଟଲି ପୀଠରେ ଏକ ମୃଣ୍ମୟ ମନ୍ଦିରେ ଦାରୁବ୍ରହ୍ମ ଜଗନ୍ନାଥ ରୂପରେ ସ୍ଥାପନ କରି ପୂଜା କରି ଆସୁଥିଲେ । ପରବର୍ତ୍ତୀ ସମୟରେ ଭକ୍ତ ଓ ଭଗବାନଙ୍କ ଲୀଳାକୁ ପ୍ରମାଣିତ କରିବା ସହିତ ଭକ୍ତର ମନୋବାଞ୍ଛା ପୂରଣ କରିବା  ପାଇଁ ମାୟାରେ ମନ୍ଦିର ଦହନ ଆଳ ଦେଖାଇ ଭକ୍ତଙ୍କୁ ଭକ୍ତି ପରାକାଷ୍ଠାର କଠୋର ପରୀକ୍ଷାର ସମ୍ମୁଖୀନ କରି ନିର୍ବାଣ ପ୍ରାପ୍ତ ହୋଇଥିଲେ । ପରେ ମହାପ୍ରଭୁ ପବିତ୍ର ଚକ୍ର ପୁଷ୍କରିଣୀରେ ସ୍ୱୟଂ ଆବିର୍ଭାବ ହୋଇ ଭକ୍ତ ପରାମାନନ୍ଦଙ୍କୁ ସ୍ୱପ୍ନାଦେଶ କ୍ରମେ ଶ୍ରୀ ଶ୍ରୀ ଦଧିବାମନ ନାମରେ ଭଟଲି ପୀଠରେ ପୂଜା ପାଇବା ପାଇଁ ନିର୍ଦ୍ଦେଶ ସହିତ ଅନ୍ନଭୋଗକୁ ନିଷେଧ ପୂର୍ବକ ବାଲଭୋଗ ଲାଗି କରିବା ପାଇଁ ନିର୍ଦ୍ଧେଶ ଦେଲେ । ସେହିଦନଠାରୁ ମହାପ୍ରଭୁ ଶ୍ରୀ ଶ୍ରୀ ଜଗନ୍ନାଥ ଦଧିବାମନ ରୂପରେ ପୂଜା ପାଇବା ସହିତ ମହାପ୍ରଭୁଙ୍କ ସହିତ ଲୀନ ହୋଇଥିବା କମଳା ଦଧିବାମନଙ୍କ ଦକ୍ଷିଣ ପାଶ୍ୱର୍ରେ ସତିହାରୀ ନାମରେ ଅଦ୍ୟାବଧି ପୂଜା ପାଇ ଆସୁଛନ୍ତି । ତେବେ ଏହିଦିନ ଠାରୁ ଏହି ପୀଠକୁ ଭକ୍ତଙ୍କ ସୁଅ ଛୁଟୁଛି । ଏଥିପାଇଁ ଏହି ପୀଠ ଭକ୍ତ ମାନଙ୍କ ପୀଠ ବୋଲି ଜଣାଯାଉଥିବାବେଳେ ମହାପ୍ରଭୁ ଶ୍ରୀ ଶ୍ରୀ ଦଧିବାମନ ସମସ୍ତଙ୍କ ମନୋବାଞ୍ଛା ପୂର୍ଣ୍ଣ କରନ୍ତି ବୋଲି ଭକ୍ତଙ୍କ ବିଶ୍ୱାସ ରହିଛି । ତେବେ ଶୀଘ୍ର ମନ୍ଦିରର ବିକାଶ ହେଲେ ସ୍ଥାନୀୟ ଲୋକଙ୍କ ରୋଜଗାର ବଢ଼ିବା ସହିତ ଅଞ୍ଚଳର ବିକାଶ ହୋଇପାରିବ ବୋଲି ବୁଦ୍ଧିଜୀବି ମହଳରେ ମତପ୍ରକାଶ ପାଇଛି ।