30-Jan-2025

କଣ୍ଟାମାଳ(ଜୟ କୁମାର ମହାରଣା): କିଶୋରୀ ବାଳିକାଙ୍କ ମଧ୍ୟରେ ଲୁକ୍କାୟିତ ଥିବା ପ୍ରତିଭାର ଅନ୍ବେଷଣ ପାଇଁ ଅଦ୍ଵିକା ଏକ ପ୍ରକୁଷ୍ଠ ମଞ୍ଚ ବୋଲି ଆଜି କଣ୍ଟାମାଳବ୍ଲକ ସାମନ୍ୱିତ ଶିଶୁ ବିକାଶ ଯୋଜନା ଆନୁକୂଲ୍ୟରେ ଆୟୋଜିତ ଅଦ୍ଵିକା ପ୍ରତିଭା ଅନ୍ବେଷଣ ଶିବିରରେ ଅତିଥି ମାନେ ମତବ୍ୟକ୍ତ କରିଛନ୍ତି l କଣ୍ଟାମାଳ ପଂଚାୟତ ଦେଉଳଡୁଙ୍ଗରି ଅଙ୍ଗନବାଡି କେନ୍ଦ୍ର ଠାରେ ଅନୁଷ୍ଠିତ ଅଦ୍ଵିକା କାର୍ଯ୍ୟକ୍ରମରେ ପ୍ରକଳ୍ପ ଅଧିକାରୀ

ପଙ୍କଜିନୀ ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ମୁଖ୍ୟଅତିଥି ପଂଚାୟତ ସମିତି ଆଧ୍ୟକ୍ଷା ସସ୍ମିତା ସେନାପତି, ସମ୍ମାନିତ ଅତିଥି ଭାବେ ଗୋଷ୍ଠୀ ଉନ୍ନୟନ ଅଧିକାରୀ ସାମି ଜୟଶ୍ରୀ ରେଡି, ସାମାଜିକ କର୍ମୀ ଦିବ୍ୟଶଙ୍କର ରାଉତ, ଅଧ୍ୟାପକ ସମୀର ମେହେର ଯୋଗଦେଇ  ବାଲ୍ୟବିବାହକୁ ନା - ପାଠ ପଢାକୁ ହଁ ର ବିଭିନ୍ନ ଦିଗ ଉପରେ ଆଲୋଚନା କରିଥିଲେ l ଅଦ୍ଵିକା କିଶୋରୀ ବାଳିକାଙ୍କ ସାମଗ୍ରିକ ବିକାଶ ଦିଗରେ କାର୍ଯ୍ୟ କରୁଥିବାରୁ ବାଳିକା ମାନେ ଏଥି ପ୍ରତି ଆଗ୍ରହ ପ୍ରକାଶ କରିଲେ ବିଦ୍ୟାଳୟରେ ପାଠ ତ୍ୟାଗୀଙ୍କ ସଂଖ୍ୟା ହ୍ରାସ ହୋଇପାରିବ ବୋଲି ମୁଖ୍ୟ ଅତିଥି ନିଜ ବକ୍ତବ୍ୟରେ ପ୍ରକାଶ କରିଥିଲେ l ଏହି ଅବସରରେ ଆୟୋଜିତ ନୃତ୍ୟ ପ୍ରତିଯୋଗିତାରେ ଶିଖା ନାଗ (ପ୍ରଥମ), ପ୍ରିୟଙ୍କା ନାଗ (ଦ୍ଵିତୀୟ) ରୁପାଞ୍ଜଳି କୁଶଳ

(ତୃତୀୟ), ଚିତ୍ରାଙ୍କନ ପ୍ରତିଯୋଗିତାରେ ବି. ସୁନନ୍ଦା (ପ୍ରଥମ), ଶ୍ରୀୟା ପ୍ରିୟଦର୍ଶନୀ ପାତ୍ର (ଦ୍ଵିତୀୟ ), ବର୍ଷାରାଣୀ ହରିପାଳ (ତୃତୀୟ ) ଏବଂ ବକ୍ତ୍ତତା ପ୍ରତିଯୋଗିତାରେ ଝିଲି ରାଣୀ ବେହେରା (ପ୍ରଥମ), ସୁଭଦ୍ରା ବିଶି (ଦ୍ଵିତୀୟ ) ବର୍ଷା ଭୋଇ (ତୃତୀୟ) ସ୍ଥାନ ଅଧିକାର କରି ଅତିଥି ମାନଙ୍କ ଠାରୁ ପ୍ରମାଣପତ୍ର ଗ୍ରହଣ କରିଥିଲେ l ସମସ୍ତ କାର୍ଯ୍ୟକ୍ରମକୁ ପ୍ରକଳ୍ପ, ମିଶନ ଶକ୍ତିର ଅଧିକାରୀ, କର୍ମଚାରୀ, ଅଙ୍ଗନବାଡ଼ି କର୍ମୀ, କେନ୍ଦ୍ର ପରିଦର୍ଶିକା ମାନେ ପରିଚାଳନାରେ ସହଯୋଗ କରିଥିଲେ l