05-Jan-2025

ଡେଲାଙ୍ଗ(ଦିଲୀପ କୁମାର ଧାଉଡିଆ): ମହତାବ ହାଇସ୍କୁଲ,ଡେଲାଙ୍ଗ ୧୯୭୯ ମସିହା ମ୍ଯାଟ୍ରିକ ବ୍ୟାଚର ସହପାଠୀ ମାନଙ୍କର ଏକ ପାରିବାରିକ ବନ୍ଧୁ ମିଳନ କାର୍ଯ୍ୟକ୍ରମ ଶୁକ୍ରବାର ବରୁଣେଇ ପୀଠ ଠାରେ ଅନୁଷ୍ଠିତ ହୋଇଯାଇଛି। ସୁଦୀର୍ଘ ୪୫ବର୍ଷ ଅତିକ୍ରାନ୍ତ ହେବା ପରେ, ଜୀବନ  ଅପରାହ୍ନର ମଧ୍ୟ ଭାଗରେ ପାଦ ଥାପିଥିବା ବନ୍ଧୁ ମାନେ ପରସ୍ପରକୁ ଭେଟି ଭାବବିହ୍ବଳ ହୋଇପଡିଥିଲେ। ଅଧିକାଂଶ ବନ୍ଧୁ ଅବସର ଜୀବନ ବିତାଉଛନ୍ତି।ଅନେକ ଏବେ ଜିଲ୍ଲା କିମ୍ବା ରାଜ୍ୟ ବାହାରେ ରହୁଛନ୍ତି।ତଥାପି ବାଲ୍ୟ ବନ୍ଧୁ ମାନଙ୍କୁ ଭେଟିବା, ସେମାନଙ୍କର ପରିବାର ପରିଜନଙ୍କ ସହିତ ପରିଚିତ ହେବା, ପିଲାଦିନର   ସ୍ମୃତିକୁ ଉଖାରି ସେଥିରେ ହଜିଯିବା ଓ ମଜ୍ଜିଯିବାରେ ସମୟ ବିତିଯାଇଥିଲା। ଇତି ମଧ୍ୟରେ କେତକ ବନ୍ଧୁ ପରଲୋକ ଗମନ କରିଛନ୍ତି।କିଛି ବନ୍ଧୁଙ୍କର ଖୋଜଖବର ମିଳୁନାହିଁ।କେତେଜଣ ଅସୁସ୍ଥ ଅଛନ୍ତି।ଏବେ ବନ୍ଧୁ ପବିତ୍ର ପରିଡା ଇହଧାମରୁ ବିଦାୟୀ ବନ୍ଧୁଙ୍କ ପାଇଁ ନିରବ ପ୍ରାର୍ଥନା,ଅସୁସ୍ଥ ବନ୍ଧୁଙ୍କର ଆରୋଗ୍ୟ କାମନା ସମୟରେ ଅଧିକାଂଶ ଭାବବିହ୍ବଳ ହୋଇ ପଡିଥିଲେ।ନିୟମିତ ବ୍ୟବଧାନରେ ପରସ୍ପରକୁ ଭେଟିବାର ନିଷ୍ପତ୍ତି ନେବା ପରେ, ପ୍ରିୟ ଶିକ୍ଷାନୁଷ୍ଠାନ ମହତାବ ହାଇସ୍କୁଲର ଶୈକ୍ଷିକ ବାତାବରଣର ବିକାଶ ଓ ଗରିବ ମେଧାବୀ ଛାତ୍ରଛାତ୍ରୀଙ୍କୁ ସହାୟତା ପ୍ରଦାନ ପାଇଁ ୭୯ ବ୍ୟାଚ ପଦକ୍ଷେପ ନେବ ବୋଲି ସ୍ଥିର ହେଲା। ପରମାନନ୍ଦ ସାହୁ ସଭାପତିତ୍ୱରେ ଏହି ବନ୍ଧୁ ମିଳନରେ ପୂର୍ଣଚନ୍ଦ୍ର ମହାପାତ୍ର, ସୁବାଷ ଚନ୍ଦ୍ର ବଳବନ୍ତରାୟ, ପୂର୍ଣ୍ଣ ଚନ୍ଦ୍ର ବଳିୟାରସିଂହ, ବିପିନି ବିହାରୀ ନରେନ୍ଦ୍ର, ପ୍ରସନ୍ନ ରଥ, ନବ ସାହୁ, ଧୂଳିରାମ ସାହୁ , ଅନନ୍ତ ଚରଣ ସାହୁ ସମେତ ୫୦ରୁ ଉର୍ଦ୍ଧ୍ୱ ବନ୍ଧୁ ପରିବାର ବର୍ଗ ଏହି ମିଳନ ଉତ୍ସବରେ ସାମିଲ ହୋଇଥିଲେ !