04-Jan-2025

  ସମ୍ବଲପୁର:(ସଂଜୀବ ପାଣିଗ୍ରାହୀ)  
ସାଂସ୍କୃତିକ ଶୋଭାଯାତ୍ରାରୁ ଆରମ୍ଭ ହୋଇଯାଇଛି ଲୋକମହୋତ୍ସବ ୨୦୨୫।ମା’ ସମଲେଈଙ୍କଠାରେ ଜିଲ୍ଲାପାଳ ତଥା ଜିଲ୍ଲା ସଂସ୍କୃତି ପରିଷଦର ଅଧ୍ୟକ୍ଷ ସିଦ୍ଧେଶ୍ୱର ବଳିରାମ ବୋନ୍ଦର,ମହାନଗର ନିଗମ କମିଶନର ବେଦଭୂଷଣ,ସଂଯୋଜକ ପ୍ରଫୁଲ୍ଲ ହୋତା,ସହ ସଂଯୋଜକ ରଞ୍ଜନ ସାହୁ ଉପଦେଷ୍ଟା ରାମଦାଶ ପଣ୍ଡା,ସୂର୍ଯ୍ୟ ପାଣିଗ୍ରାହୀ ପ୍ରମୁଖ ପୂଜା କରିବା ପରେ ସାଂସ୍କୃତିକ ଶୋଭାଯାତ୍ରା ଦଶରଥ ମେହେରଙ୍କ ଆବାହତ୍ୱରେ ଆରମ୍ଭ ହେଲା। ଏଥିରେ ବାଉଁଶ ତିଆରି ଭୁଗା,ଟୋକେଇ,କୁଲା ଆଦିରେ ନିର୍ମିତ ଏକ ସୁଦୃଶ୍ୟ ତୋରଣରେ ମା’ ସମଲେଈଙ୍କ ପ୍ରତିମୂର୍ତ୍ତି ଅଗ୍ରଭାଗରେ ରହିଥିବା ବେଳେ ଏଥିରେ  ଶଙ୍ଖ,ଘଣ୍ଟବାଦ୍ୟ,ସଂକୀର୍ତ୍ତନ,ଦଣ୍ଡ,କୃଷ୍ଣଗୁରୁ,କହର ସଂସ୍ଥା,ଭାରତୀ କଳା ପରିଷଦ,ଗୋଟିପୁଅ,ଦୁଲଦୁଲି ସମେତ ବୋଡୋ,ନେପାଳି ନାଚ,ପୁରୁଲିଆ ଛଉ,ହରିଆଣାର ଫଗ ନାଚ,ମହାରାଷ୍ଟ୍ରର ଲାବଣୀ,ଆସାମର ବିହୁ,ଗୁଜୁରାଟର ଲୋକନୃତ୍ୟ ଆଦି ଭାଗନେଇଥିଲେ।
ସନ୍ଧ୍ୟା କାର୍ଯ୍ୟକ୍ରମ ପୂର୍ବରୁ ଲୁପ୍ତବାଦ୍ୟରେ ସମ୍ବଲପୁର ଜିଲ୍ଲା ଅର୍ଡାର ଘୁଡକା,ଭତରାର ଧୁନକେଲ ପ୍ରଦର୍ଶିତ ହୋଇଥିବାବେଳେ ନାଚରେ ଯାଦୁଲୁଇସିଂର ଦଣ୍ଡ ନୃତ୍ୟ,ସୁନ୍ଦରଗଡ ଜିଲ୍ଲାର କିଷାନ ନାଚ ଓ କରମାନାଚ ପ୍ରଦର୍ଶିତ ହୋଇଥିଲା। ଏହି ଲୁପ୍ତପ୍ରାୟ ଲୋକବାଦ୍ୟ ଓ ନୃତ୍ୟ ତିନି ଦିନ ଧରି ପରିବେଶିତ ହେବ ବୋଲି ଆବାହକ ଆଲୋକ କୁମାର ପଣ୍ଡା ଓ କୃଷ୍ଣଚନ୍ଦ୍ର ବାଗ ସୂଚିତ କରିଥିଲେ।
ମଞ୍ଚ କାର୍ଯ୍ୟକ୍ରମ :
ମଞ୍ଚ କାର୍ଯ୍ୟକ୍ରମ ପୂର୍ବରୁ ସଂଯୋଜକ ପାରମ୍ପରିକ ରୀତିରେ ମଞ୍ଚ ପୂଜା କରିବାପରେ ଲୋକଗୀତର କାର୍ଯକ୍ରମ ଆରମ୍ଭ ହେଲା ଏଥିରେ ପଦ୍ମଲୋଚନ ଦାଶଙ୍କ ସଂଯୋଜନାରେ ଦିଲୀପ ବାଗ, ମା’ ସମଲେଈ ଜଗତ ଜନନୀ,ଶ୍ରୀଜା ଦାଶ ରତନ କୁମାର ପୂଜାରୀଙ୍କ ଲିଖିତ କୃଷ୍ଣଗୁରୁ ଭଜନ,ଅରୁଣ ରାଜହଂସ ନଚନିଆ ଗୀତ ପରିବେଷଣ କରିଥିଲେ। ଅତଥିମାନଙ୍କ ଆଗମନ ପରେ ସମଲେଈ ମନ୍ଦିରର ଆଲତୀ ବାଦ୍ୟକାରମାନଙ୍କ ବାଦ୍ୟତାଳରେ ଅତିଥିମାନେ ମା’ସମଲେଈଙ୍କଠାରେ ଦୀପ ପ୍ରଜ୍ଜ୍ୱଳନ କରିଥିଲେ।
ସଂଯୋଜକଙ୍କ ପ୍ରାରମ୍ଭିକ ସୂଚନା ପରେ ଜିଲ୍ଲାପାଳ ସ୍ୱାଗତ ଭାଷଣ ଦେଇଥିଲେ,ବିଧାୟକ ଜୟନାରାୟଣ ମିଶ୍ର ତାଙ୍କ ବକ୍ତବ୍ୟରେ କହିଥିଲେ ଯେ, କଳା ସଂସ୍କୃତି ଜାତି ଓ ଦେଶକୁ ଏକ କରେ। ଏହି କଳା ସଂସ୍କୃତି ହିଁ ଆମର ପୁଞ୍ଜି ଅଟେ ଯାହାକୁ ନେ ଆମେ ଆଗକୁ ବଢି ପାରିବା। ମୁଖ୍ୟ ଅତିଥି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଥିଲେ ସମ୍ବଲପୁର ଅଞ୍ଚଳର ସମସ୍ତ ଉତ୍ସବ ମହୋତ୍ସବ ଅଟେ। ଏଠାକାର ରଙ୍ଗବତୀର ବିକଳ୍ପ ନାହିଁ। ଏହା ଏହି ଅଞ୍ଚଳର ପରିଚୟ ବହନ କରେ। ଡବଲ ଇଂଜିନ ସରକାରଙ୍କ ପକ୍ଷରୁ ଏହି ଅଞ୍ଚଳର ବିକାଶକୁ ବହୁତ ଗୁରୁତ୍ୱ ଦିଆଯାଉଛି ବୋଲି କହି ସେ ସମ୍ବଲପୁରରେ ଟବି ରୋଗ ନିପାତ,ସ୍ଥାନୀୟ ଲୋକଙ୍କୁ ନେଇ ପିଏଚଡି ପଡିଆର ବିକାଶ, ହୀରାକୁଦ ବନ୍ଧ ଓ କେନାଲର ମରାମତି କାର୍ଯ୍ୟ ସମେତ ରାଜ୍ୟ ସ୍ତରରେ ସୁଭଦ୍ରା ଯୋଜନାର ସଫଳତା ଚାଷୀଙ୍କୁ କ୍ୟୁଇଣ୍ଟାଲ ପିଛା ମୂଲ୍ୟର ବର୍ଦ୍ଧନ ଆଦି ସରକାରଙ୍କ ଉନ୍ନୟନ ମୂଳକ କାର୍ଯ୍ୟ ଗୁଡିକ ଉପରେ ତାଙ୍କ ବକ୍ତବ୍ୟ ରଖିଥିଲେ। ମଞ୍ଚରେ ପଦ୍ମଶ୍ରୀ ମିତ୍ରଭାନୁ ଗୌନ୍ତିଆ ଓ ପଦ୍ମଶ୍ରୀ କ୍ରିଷ୍ଣା ପଟେଲ,ଉତ୍ତରାଞ୍ଚଳ ଆଇ ଜି ହିମାଂଶୁ କୁମାର ଲାଲ,ଏମ ସି ଏଲର ପରିଚାଳନା ନିର୍ଦ୍ଦେଶକ ଅନନ୍ତ ଉଦୟ କାଲୋଇ ଉପସ୍ଥିତ ଥିଲେ।ଏହି ଅବସରରେ ଆବାହକ ଡା ରାଜାରାମ ଷଢଙ୍ଗୀଙ୍କ ଆବାହକତ୍ୱରେ ମୁଖ୍ୟ ସମ୍ପାଦକ ଡ.ଶ୍ୟାମ ସୁନ୍ଦର ଧର,ସମ୍ପାଦକ ଡ. ସତ୍ୟନାରାୟଣ ଠାକୁର,ଡ. ଗୌରିଦାସ ପଧାନ ଓ ଡ. ସିଦ୍ଧାର୍ଥ ପଣ୍ଡାଙ୍କ ଉପସ୍ଥିତିରେ ଚଳିତ ବର୍ଷର ସ୍ମରଣିକା ଅତିଥିମାନଙ୍କ ଦ୍ୱାରା ଲୋକାର୍ପିତ ହୋଇଥିଲା। ଏହାପରେ ବିଶିଷ୍ଟ ଗାୟିକା ଭାରତୀ ରାୟ ଓ ନାଟ୍ୟବିତ ଉତ୍ତମ ବେହେରାଙ୍କୁ ମଞ୍ଚରେ ସମ୍ମାନିତ କରାଯାଇଥିଲା। ମହାନଗର ନିଗମ କମିଶନର ବେଦଭୂଷଣ ଧନ୍ୟବାଦ ଅର୍ପଣ କରିଥିଲେ।
ଉଦଘାଟନୀ ସଭା ପରେ ପୁନର୍ବାର ଲୋଗଗୀତ କାର୍ଯକ୍ରମ ଅନୁଷ୍ଠିତ ହେଲା ଏଥିରେ ପ୍ରିତିନନ୍ଦା ମିଶ୍ର ବାଙ୍ଗିରୀ ଶୈଳୀର ଏକ ଗୀତ ପରିବେଷଣ କରିଥିଲେ।
ଲୋକନୃତ୍ୟ ପର୍ଯ୍ୟାୟରେ ପ୍ରଥମେ ବିଭିନ୍ନ ଜାତୀୟ ଦଳଙ୍କ ମିଳିତ ଏକ ଫ୍ୟୁଜନ ନୃତ୍ୟ ପରିବେଶିତ ହୋଇଥିଲା। ବିଦ୍ୟାଶ୍ରୀ କଳାକେନ୍ଦ୍ର ଧନକଉଡା ଡାଲଖାଇ,ଆସାମର ବଡୋ,ପୁରୀର ଗୋଟିପୁଅ,ସିକ୍କିମର ତମାଙ୍ଗ ସେଲୋ ନାଚ,ସମ୍ବଲପୁର ଉକିଆ ଅନୁଷ୍ଠାନର ପରଭା ନାଚ,ଆସାମର ବିହୁ,ମହାବୀର ସାଂସ୍କୃତିକ ଅନୁଷ୍ଠାନର ଘୁମୁରା ନାଚ,ହରିଆଣାର ଘୁମର,ସମ୍ବଲପୁର ଲହରି ଅନୁଷ୍ଠାନର ଢାପ,ମହାରାଷ୍ଟ୍ରର ଲାବଣୀ,ରାୟଗଡାର ଢେମସା ନୃତ୍ୟ,ଗୁଜୁରାଟର ସିଦ୍ଧିଧମାଲ ଓ ଶେଷରେ ଝାରଖଣ୍ଡ ପୁରୁଲିଆର ଛଉ ନୃତ୍ୟ  ପରିବେଶିତ ହୋଇଥିଲା।
ଆଜି ସନ୍ଧ୍ୟାର ଉଦଘୋଷକ ଭାବରେ ଉମାଶଙ୍କର ଦାସ,ଅର୍ଚିକା ପ୍ରିୟଦର୍ଶିନୀ ପଣ୍ଡା,ଗଣେଶ ମେହେର,ସ୍ୱାଗତିକା ପଣ୍ଡା, ସୁଶ୍ରୀ ପାଣିଗ୍ରାହୀ, ଜ୍ୟୋତିରାଦିତ୍ୟ ମହାନ୍ତି,ହରିଶ ପ୍ରମୁଖ ରହିଥିଲେ।