26-Aug-2024

ବଲାଙ୍ଗୀର: ଆଜି ହେଉଛି ପବିତ୍ର ଶ୍ରୀକୃଷ୍ଣ ଜନ୍ମାଷ୍ଟମୀ।ଏହି ପର୍ବ ଭାଦ୍ରବ ମାସ କୃଷ୍ଣ ପକ୍ଷ ଅଷ୍ଟମୀ ତିଥିରେ ପାଳନ କରାଯାଏ।ମହାପ୍ରଭୁ ଶ୍ରୀକୃଷ୍ଣ ଙ୍କ ଜନ୍ମ ଉତ୍ସବ ଆଜି ସାରା ଦେଶରେ ପାଳନ କରାଯାଉଛି।ସେହିଭଳି ବଲାଙ୍ଗୀର ରାଧାରାଣୀ ପଡା ସ୍ଥିତ ରାଧା କୃଷ୍ଣ ମନ୍ଦିର ଏବଂ ପାଟଣା ହୋଟେଲ ଛକ ନିକଟରେ ଥିବା ହନୁମାନ ମନ୍ଦିରରେ ମହାସମାରୋହରେ ପାଳିତ ହେଉଛି। ସାରା ଦେଶରେ ବିଶେଷ କରି ବୈଷ୍ଣବ ଧର୍ମାବଲମ୍ବୀ ଶ୍ରଦ୍ଧାଳୁ ଭକ୍ତ ମାନେ ଉତ୍ସାହର ସହ ପାଳନ କରୁଛନ୍ତି କୃଷ୍ଣ ଜନ୍ମୋତ୍ସବ।ଆଜି ମଥୁରା ବୃନ୍ଦାବନ ରେ ଭକ୍ତି ମୟ ପରିବେଶରେ ମହାପ୍ରଭୁ ଶ୍ରୀକୃଷ୍ଣ ଙ୍କୁ ଆବାହନ କରାଯିବା ସହ ତାଙ୍କ ୫୨୫୧ ତମ ଜନ୍ମାଷ୍ଟମୀ ଉତ୍ସବ ଦ୍ବାରିକା ନଗରୀରେ ପାଳିତ ହେଉଛି।ପୁରୀ ଶ୍ରୀମନ୍ଦିରରେ ମଧ୍ୟ ନୀତି ନିୟମ ରେ ଶ୍ରୀକୃଷ୍ଣ ଜନ୍ମ ଉତ୍ସବ ଅନୁଷ୍ଠିତ ହେବ।ସନ୍ଧ୍ୟା ଧୂପ ପରେ ଶ୍ରୀକୃଷ୍ଣ ଙ୍କ ଜନ୍ମ ଉତ୍ସବ ପାଳନ କରାଯାଇଥାଏ।ଆଜି ମହାଜନ ସେବକ ଙ୍କ ଦ୍ଵାରା ଶ୍ରୀକୃଷ୍ଣ ଜନ୍ମ ଅନୁଷ୍ଠିତ ହେବ।ଜନ୍ମ ଚକଡା଼ ରେ ନିଶାର୍ଦ୍ଧରେ ପ୍ରଭୁ କୃଷ୍ଣ ଜନ୍ମ ନେବେ।ସନ୍ଧ୍ୟା ଧୂପ ପରେ ଜୟ ବିଜୟ ଦ୍ଵାର ବନ୍ଦ କରାଯାଇ ଭଣ୍ଡାର  ଘର ସମ୍ମୁଖ ଭାଗରେ ପୂଜା ପଣ୍ଡା ସେବାୟତ ମାନେ ପଞ୍ଚ ବର୍ଣ୍ଣ ମୁରୁଜ ରେ ଜନ୍ମ ମଣ୍ଡଳୀ କରିବେ।ସେଠାରେ ସୁନାର କୃଷ୍ଣ ମୂର୍ତ୍ତି ରଖାଯାଇ ଦକ୍ଷିଣ ଘରୁ ମଦନ ମୋହନ ଙ୍କୁ ଅଣାଯାଏ। ଦେବକୀ ବସୁଦେବ ଚରିତ୍ର ଦୁଇଜଣ ମହାଜନ ସେବକ ଏହି ଜନ୍ମ ନୀତି ପାଳନ କରନ୍ତି। ତାପରେ ମଦନ ମୋହନ ଙ୍କୁ ନାଭିକଟା ମଣ୍ଡପ କୁ ନେଇ କୃଷ୍ଣ ଜନ୍ମ ଠାରୁ ଉପନୟନ ପର୍ଯ୍ୟନ୍ତ ନୀତି ପାଳନ ହେବ।ଶ୍ରୀକୃଷ୍ଣ ଜନ୍ମ ନୀତି ଆରମ୍ଭ ହୋଇ କଂସବଧ ଲୀଳା ପର୍ଯ୍ୟନ୍ତ ଚାଲୁ ରହେ।ଜନ୍ମାଷ୍ଟମୀ ପାଇଁ ଶ୍ରୀକୃଷ୍ଣ ଜନ୍ମସ୍ଥାନ ମଥୁରା ନଗରୀ ଚଳ ଚଞ୍ଚଳ ହୋଇ ଉଠିଛି।ଗୁଜୁରାଟ ର ଦ୍ୱାରକାଧିଶ ମନ୍ଦିର ମଧ୍ୟ ଶ୍ରୀକୃଷ୍ଣ ଜନ୍ମୋତ୍ସବ ପାଳନ ଅବସରରେ ଆକର୍ଷଣୀୟ ଆଲୋକ ମାଲାରେ  ଝଲସି ଉଠେ।ଆଜିର ଏହି ପବିତ୍ର କୃଷ୍ଣ ଜନ୍ମୋତ୍ସବ ସବୁଠି ଧୁମଧାମରେ ପାଳନ ହେଉଥିବା ବେଳେ ସମସ୍ତ ଙ୍କ ମନରେ ଖୁସିର ଲହରୀ ଖେଳିଯାଇଛି।