23-Aug-2024

ଫୁଲବାଣୀ[କ୍ଷୀରୋଦ କୁମାର ସାହାଣୀଙ୍କ ରିପୋର୍ଟ] କନ୍ଧମାଳ ଜିଲ୍ଲାରେ ବର୍ତମାନ ବହୁ ମୂଲ୍ୟବାନ ସରକାରୀ ଜମିକୁ କିଛି ଦଲାଲ ମନଇଚ୍ଛା ଶାଗମାଛ ଦରରେ ବେଆଇନ ଭାବେ ବିକ୍ରି କରି ନିଜର ସ୍ୱାର୍ଥ ହାସଲ କରିବାରେ ବ୍ୟସ୍ତ ଥିବା ବେଳେ ରାଜସ୍ବ ବିଭାଗ ନିରବଦ୍ରଷ୍ଟା ସାଜି ଆଖି ବନ୍ଦ କରି ରହୁଛି । ବିଶେଷ ଘଟଣା ହେଲା ଫୁଲବାଣୀ ତହସିଲ ଅଧୀନରେ ଥିବା ବିଶିପଡା ରାଜସ୍ବ ବିଭାଗ ଅଂଚଳର ବିଶିପଡା ମୌଜା ଖାତା ନଂ ୩୭୫ ପ୍ଲଟ ନଂ ୫୧ ସରକାର ଓ  ସର୍ବସାଧାରଣଙ୍କ ନିମନ୍ତେ  ଅଙ୍ଗନବାଡି କେନ୍ଦ୍ର, ବିଦ୍ୟାଳୟ ସ୍ଥାପନ, ଧର୍ମମଣ୍ଡପ  ଭଳି ସାମୁହିକ ଉନ୍ନତି ନିମନ୍ତେ ଉଦ୍ଦିଷ୍ଟ ଥିବା ବହୁ ମୂଲ୍ୟବାନ ଜମି କିଛି ଦଲାଲ ଜବରଦଖଲ କରି ବେଆଇନ ନିଶା କାରବାର, ମଦବିକ୍ରି କରିବା, ଗଂଜେଇ ବ୍ୟବସାୟ କରି ଉକ୍ତ ଅଂଚଳରେ ଏକ ଅସ୍ୱାଭିକ ପରିସ୍ଥିତି ସୃଷ୍ଟି କରୁଥିଲେ। ଏପରି ଅସାମାଜିକ କାର୍ଯ୍ୟ ସେଇ ଅଂଚଳରେ ଦିନରାତି ଚାଲୁଥିବା ଫଳରେ ଶାନ୍ତପ୍ରିୟ ଜନସାଧାରଣଙ୍କ ବାରମ୍ବାର ଅଭିଯୋଗ କ୍ରମେ ବିଶିପଡା ରାଜସ୍ବ ନିରୀକ୍ଷକ ରାଜେନ୍ଦ୍ର କୁମାର ଷଡ଼ଙ୍ଗୀ ଓ ସହକାରୀ ନିରୀକ୍ଷକ ଶ୍ରୀମତୀ ଅଞ୍ଜଳି ରଣା ଘଟଣାସ୍ଥଳରେ ପହଂଚି କିଛି ଜବରଦଖଲକାରୀଙ୍କ କବଳରୁ ଉକ୍ତ  ମୂଲ୍ୟବାନ ଜମିକୁ ଜବରଦଖଲ ଉଛେଦ କରିପାରିଛନ୍ତି । ପୂର୍ବରୁ ବିଶିପଡା ରାଜସ୍ବ ବିଭାଗ ଅଧୀନରେ ଥିବା ବହୁ ସରକାରୀ ଜମି ଜବର ଦଖଲ ହୋଇଥିଲେ ମଧ୍ୟ୍ୟ କୌଣସି ଆରଆଇ ଉକ୍ତ ଜମିଗୁଡିକ ଜବରଦଖଲ ଉଛେଦ କରି ନଥିଲେ । ଆରଆଇ ରାଜେନ୍ଦ୍ର କୁମାର ଷଡ଼ଙ୍ଗୀ ଉକ୍ତ ଜମିକୁ ଜବରଦଖଲ ମୁକ୍ତ କରି ଜଣେ ନିଷ୍ଠାପର ସରକାରୀ କର୍ମଚାରୀର କାର୍ଯ୍ୟ କରିଥିବା ଯୋଗୁଁ ଜନସାଧାରଣଙ୍କ ଦ୍ୱାରା ଭୁୟସୀ ପ୍ରଶଂସା କରାଯାଉଥିବା ଦେଖିବାକୁ ମିଳିଛି । ଉକ୍ତ ଜମି ଜବରଦଖଲ ଉଛେଦ ସମୟରେ ସହକାରୀ ଆରଆଇ ଶ୍ରୀମତୀ ଅଞ୍ଜଳି ରଣା ସମେତ ଗ୍ରାମବାସୀଙ୍କ ମଧ୍ୟରେ ଦୀନବନ୍ଧୁ ସାହାଣୀ, ରମେଶ ଚନ୍ଦ୍ର ସାହାଣୀ, ଉତ୍ତମ ସାହାଣୀ, ଗୋପବନ୍ଧୁ ସାହାଣୀ ଲକ୍ଷ୍ମୀଧର ସାହାଣୀ ସୁବଲ ସାହାଣୀ, ଋତୁପୂର୍ଣ୍ଣ ସାହାଣୀ ଉପସ୍ଥିତ ରହି ସମ୍ପୂର୍ଣ୍ଣ ସହଯୋଗ କରିଥିଲେ । ଭବିଷ୍ୟତରେ ଉକ୍ତ ସରକାରୀ ଜମିରେ କୌଣସି ବ୍ୟକ୍ତିଙ୍କୁ ଜବରଦଖଲ କରିବାକୁ ଦିଆଯିବ ନାହିଁ ବୋଲି ଆରଆଇ ରାଜେନ୍ଦ୍ର କୁମାର ଷଡ଼ଙ୍ଗୀ ଜବର ଦଖଲକାରି ମାନଙ୍କୁ ସଚେତନ କରିଦେଇ ଥିଲେ ଓ ଏହି ଜମି ଉଛେଦ କାର୍ଯ୍ୟ କରିବା ପାଇଁ ଫୁଲବାଣୀ ତହସିଲଦାର ସଚ୍ଚିଦାନନ୍ଦ ନାଏକ ସମସ୍ତ ପ୍ରକାର ପ୍ରଶାସନିକ ସହାୟତା ଯୋଗାଇ ଦେଇଥିଲେ  |