21-Aug-2024

ସଇଁନ୍ତଳା(ପ୍ରେରଣା ଖବର): ସଇଁନ୍ତଳା ବ୍ଲକ୍ ର କସ୍ତୁରବା' ଗାନ୍ଧୀ ବାଳିକା ବିଦ୍ୟାଳୟ ବା କେଜିବିଭିର ଦୂରବସ୍ଥା ଆଖିରେ ନଦେଖିଲେ ବିଶ୍ବାସ କରିହେବ ନାହିଁ ।  ଗାଁ' ମୁଣ୍ଡ ଅପନ୍ତରାରେ ୨୦୧୪ର ରଙ୍ଗଛଡା ପୁରୁଣା ହଷ୍ଟେଲ ବିଲଡିଂ ସାଙ୍ଗକୁ ଏଠାରେ ପାଠପଢ଼ାର ବ୍ୟବସ୍ଥା ନଥିବା ଓ ଏଠାରୁ ପ୍ରାୟ ଅଢେଇ କିମି ଦୂରରେ କୁମାରୀ ଓ ଡେଙ୍ଗ୍ ଗ୍ରାମରେ ଥିବା ସ୍କୁଲରେ ପଢୁଥିବା ୯ମ ଓ ୧୦ମ ଶ୍ରେଣୀର ଛାତ୍ରୀଙ୍କ ପାଇଁ ଏକ ନିର୍ମାଣାଧୀନ ନୂଆ ହଷ୍ଟେଲ ସହ ଅକ୍ଷର ଲିଭି ଯାଇଥିବା ଗେଟ୍ , ଅସୁରକ୍ଷିତ ଅନୁଚ୍ଚ ପାଚେରୀ ଏବଂ ବଣବୁଦା ଘେରା ଛାତ୍ରୀନିବାସକୁ ଦେଖିଲେ ଏଇ ପାମ୍ପରାଦୁଇମହଲା କୋଠାର ଭଙ୍ଗାଦଦରା ପାମ୍ପରା କୋଠରୀରେ ଯେ ୧୦୦ ଅନ୍ତେବାସିନୀ କିଶୋରୀଛାତ୍ରୀ କିପରି ରହୁଥିବେ , କଳ୍ପନା କରିବା କଷ୍ଟକର  !  ଅନତିଦୂରରେ ଗାଁ' ଭିତରେ ଅବସ୍ଥିତ ଉଚ୍ଚ ପ୍ରାଥମିକ ବିଦ୍ୟାଳୟରେ ଅନ୍ୟାନ୍ୟ ପିଲାମାନଙ୍କ ସହ ଏହି ଛାତ୍ରୀଛାତ୍ରୀମାନେ ପାଠପଢନ୍ତି । ଏଇ ସ୍କୁଲର ସମୁଦାୟ ଛାତ୍ରଛାତ୍ରୀଙ୍କ ସଂଖ୍ୟା ୧୦୦+୧୩୨ = ୨୩୨ । ଦୀର୍ଘ ୭ ବର୍ଷ ଧରି   ଏହି ସ୍କୁଲ ଓ ୨୦୧୧ରୁ ଖୋଲିଥିବା କେଜିବିଭିର ପ୍ରଧାନଶିକ୍ଷୟିତ୍ରୀ ବନାମ ସୁପରିଣ୍ଟେଣ୍ଡେଣ୍ଟ୍ ଅଛନ୍ତି  ସ୍ନେହଣଞ୍ଜୁଳା ନନ୍ଦ ଓ କେଜିବିଭିର ମେଟ୍ରନ୍ ବନ୍ଦିତା ଶତପଥୀ । ସ୍କୁଲ୍ ର ୭ଜଣ ଶିକ୍ଷକ / ଶିକ୍ଷୟିତ୍ରୀ , ୨ ଜଣ ସ୍ଥାୟୀ/ ଅସ୍ଥାୟୀ ରାନ୍ଧୁଣୀଙ୍କୁ ନେଇ ତାଙ୍କର ଶିକ୍ଷାସଂସାର । ତେବେ ଆମର ପ୍ରତିନିଧି ଦଳ ଗତକାଲି ଏଇ ସ୍କୁଲକୁ ଗଲାବେଳେ କୌଣସି ପିଅନ ଫିଅନ ନଥିବାରୁ ନିଜେ ପ୍ରଧାନଶିକ୍ଷୟିତ୍ରୀ ଅଫିସ୍ କୁ ଟାଣି ଟାଣି ଦୁଇତିନୋଟି ପ୍ଲାଷ୍ଟିକ୍ ଚୌକି ଆଣି ପକାଇ ଘାବୁରେଇ ଗଲାପରି ଲାଗୁଥିଲେ । ନା ତ ସେ କହିପାରିଲେ ସ୍କୁଲଗୁଡିକୁ ମିଳୁଥିବା ପି ଏଫ୍ ଏମ ଏସ ପାଣ୍ଠି ସମ୍ପର୍କରେ , ନା ଥିଲା କୌଣସି ଖାତାପତ୍ର ( ପଚାରିବାରୁ ଅଡିଟ ଥିବାରୁ ଘରକୁ ନେଇଯାଇଛି ସଫେଇ ଦେଲେ ) , ନା ସ୍କୁଲର ସାମଗ୍ରୀ କେଉଁ ଭେଣ୍ଡରଙ୍କ ଠାରୁ କିଣନ୍ତି ପଚାରିଲେ , ସେ ' ଭେଣ୍ଡର ' କ'ଣ ବୋଲି ପ୍ରଥମେ ବୁଝି ନପାରି କିଛିବେଳ ପରେ ଦୁଇଜଣ ଦୋକାନୀଙ୍କ ନାଁ କହିଲେ ଓ କେଜିବିଭିର ଡାଏଟ୍ , ପାଇଖାନାଦି ପରିଷ୍କାରପରିଚ୍ଛନ୍ନତା ବା ସୁବିଧାଅସୁବିଧା ସମ୍ପର୍କରେ କିଛି ଜାଣିଥିବା ଜଣାପଡିଲା । ଛେପ ଢୋକି ଢୋକି ଖାଲି କହିଲେ , ୧୦ ଜଣିଆ ସ୍କୁଲ କମିଟିର ସଭାପତି ଅଛନ୍ତି ଗାଁ'ର ତପୀ ଜାନୀ । ଜାନୀବାବୁଙ୍କ ଦେଖା ହୋଇପାରିଲାନି । ତେବେ ପ୍ରତି ଛାତ୍ରୀପିଛା ସରକାର ୮୦ଟଙ୍କାର ଦୈନିକ ମେସ୍ ଖର୍ଚ୍ଚ , ଅନ୍ୟାନ୍ୟ ଆନୁସଙ୍ଗିକ ଖର୍ଚ୍ଚବାର୍ଚ୍ଚ , ପୋଷାକ ବା ୟୁନିଫର୍ମ , ସ୍ବାସ୍ଥ୍ୟାବସ୍ଥାଦିର କୌଣସି କ୍ଷେତ୍ରରେ ସୁବ୍ୟବସ୍ଥା ଥିବା ଜଣାପଡିଲା ନାହିଁ !

ପଶ୍ଚାତାପ ହେଲା , କାହିଁକି ଯେ ସରକାର ବନାମ ସର୍ବଶିକ୍ଷା

ଅଭିଯାନ ବା ସମଗ୍ରଶିକ୍ଷାର ଶିକ୍ଷାବିଭାଗ ଓ ଏଥିପାଇଁ ଅନ୍ୟ କର୍ତ୍ତୃପକ୍ଷମାନେ ରହିବା ସତ୍ତ୍ୱେ ଏପରି ଏକ ଅପନ୍ତାରରେ କାହା ସ୍ବାର୍ଥରେ ଏଠାରେ କେଜିବିଭି ବା ଶହେଟି ଛାତ୍ରୀଙ୍କର ଏକ ସ୍ବତନ୍ତ୍ର ଆବାସିକ ଶିକ୍ଷାନୁଷ୍ଠାନ ରହିଛି , ବୁଝିବା ଦୁଷ୍କର  ! ପ୍ରଧାନଶିକ୍ଷୟିତ୍ରୀଙ୍କ କହିବାନୁଯାୟୀ , କୁଆଡେ ଗତ ମେ ମାସରେ ଡିପିସି ତଥା ଡିଇସି ଧ୍ରୁବ ଚରଣ ବେହେରା ଯାଇଥିଲେ ସେଠିକି । ତେବେ ତାଙ୍କ ଆଖିରେ କେମିତି ଏ ବିବର୍ଣ ଖଣ୍ଡହର୍ ପରି ଦିଶୁଥିବା ଛାତ୍ରୀନିବାସ ସହ ଅନ୍ୟାନ୍ୟ ଅବ୍ୟବସ୍ଥାର ଦୃଶ୍ୟ ପଡିଲାନାହିଁ ଓ ଏତେଦିନରେ ସେ କି ପଦକ୍ଷେପ ନେଲେ , ତାଙ୍କୁ ପଚାରିଲେ ଜଣାପଡିବ ।