05-Jul-2023

ବରଗଡ଼:-ବରଗଡ଼ର ପ୍ରଥମ ଶିଶୁରୋଗ ବିଶେଷଜ୍ଞ ଭାବେ ସ୍ବାସ୍ଥ୍ୟବିଭାଗ ଅଧୀନରେ କାର୍ଯ୍ୟାରମ୍ଭ କରି ଜିଲ୍ଲାବାସୀଙ୍କୁ ଦୀର୍ଘ ବର୍ଷ ଧରି ସେବା ଦେଇଆସିଥୁବା ପେଡିଏଟ୍ରିସିଏନ ଡ଼.ଗୋବିନ୍ଦ ସାହୁ (୭୭)ଙ୍କ ଆଜି ପରଲୋକ ହୋଇଯାଇଛି । ଦୀର୍ଘଦିନ ଧରି ଶ୍ଵାସ ରୋଗରେ ପୀଡ଼ିତ ଥ‌ିବା ବେଳେ ଆଜି ତାଙ୍କର ଭଟଲିରୋଡ଼ ସ୍ଥିତ ବାସଭବନରେ ପରଲୋକ ହୋଇଯାଇଥିଲା । ଏନେଇ ଖବର ପାଇ ବରଗଡ଼ର ବହୁ ମାନ୍ୟଗଣ୍ୟ ବ୍ୟକ୍ତି ତାଙ୍କ ବାସଭବନରେ ପହଂଚି ଶେଷ ଦର୍ଶନ କରି ପରିବାରବର୍ଗଙ୍କୁ ସମବେଦନା ଜଣାଇଥିଲେ । ଖବରପାଇ ବରଗଡ଼ର ବରିଷ୍ଠ ଚିକିତ୍ସକଗଣ ଡ଼.ପି.ଏଲ.ତ୍ରିପାଠୀ, ଡ଼.ଉମେଶ ତ୍ରିପାଠୀ, ଡ଼.ସରୋଜ କୁମାର ଯୋଷୀ, ଡ଼ି.ଆର. ଏନ.ଦାଶ, ଡ.ଏସ. ଏଲ.ଶର୍ମା, ଡ.ପି. କେ.ଦାଶଙ୍କ ସମେତ ବହୁ ଡ଼ାକ୍ତରମାନେ ତାଙ୍କର ବାସଭବନରେ ପହଂଚି ସ୍ୱର୍ଗତ ସାହୁଙ୍କୁ ଶ୍ରଦ୍ଧାସୁମନ ଅର୍ପଣ କରିଥିଲେ । ପରେ ଜୀରାନଦୀ ଶ୍ମଶାନରେ ତାଙ୍କର ଅନ୍ତିମ ସଂସ୍କାର ସମ୍ପନ୍ନ କରାଯାଇଥିବା ବେଳେ ବଡ଼ପୁଅ ବିଜୟ ମୁଖାଗ୍ନି ଦେଇଥିଲେ । ପ୍ରକାଶଥାଉକି, ବରଗଡ଼ର ପ୍ରଥମ ଶିଶୁରୋଗ ବିଶେଷଜ୍ଞ ଭାବେ କାର୍ଯ୍ୟାରମ୍ଭ କରିଥିବା ଡ଼.ସାହୁ ତାଙ୍କର ଉତ୍ତମ ସେବା ପାଇଁ ଇଣ୍ଡିଏନ ଏକାଡ଼େମୀ ଅଫ ପେଡ଼ିଏଟ୍ରିକ୍ସ ତରଫରୁ ୨୦୦୫ରେ ସମ୍ବଦ୍ଧିତ ହୋଇ ଶିଶୁ ଶଖା ସମ୍ମାନରେ ସମ୍ମାନୀତ ହୋଇଥିଲେ । ୨୦୦୬ରେ ସିଡ଼ିଏମଓ ଭାବେ ସରକାରୀ ସେବାରୁ ଅବସରଗ୍ରହଣ କରିଥିଲେ । ଘରୋଇ ଚିକିତ୍ସାରେ କିଛିଦିନ ବ୍ୟସ୍ତ ରହିବା ପରେ ସ୍ଵାସ୍ଥ୍ୟଗତ କାରଣରୁ ରୋଗୀ ଦେଖାରୁ ଅବ୍ୟାହତି ନେଇଥିଲେ । ସ୍ଵର୍ଗତ ଡ଼.ସାହୁ ତାଙ୍କ ପଛରେ ସ୍ତ୍ରୀଙ୍କ ସମେତ ଦୁଇପୁଅ ବିଜୟ ଓ ସୁନୀଲ, ଦୁଇ ଝିଅ ପିଙ୍କି ଓ ରୋଜି, ଦୁଇ ଜ୍ଵାଇଁ ସୁଶାନ୍ତ ଓ ଦୀପେଶଙ୍କ ସମେତ ବୋହୂ, ନାତିନାତୁଣୀମାନଙ୍କୁ ଛାଡ଼ି ଚାଲିଯାଇଛନ୍ତି । ତେବେ ତାଙ୍କର ବିୟୋଗରେ ବରଗଡ଼ରେ ଗଭୀର ଶୋକ ଖେଳିଯାଇଛି ।
ନିରଞ୍ଜନ ତ୍ରିପାଠୀଙ୍କ ରିପୋର୍ଟ