06-Jun-2023

ବଲାଙ୍ଗିର(ପ୍ରେରଣା ଖବର): ବିଶ୍ଵ ପରିବେଶ ଦିବସ ପାଳନ ଅବସରରେ ବଲାଙ୍ଗିର ଵିଜାଖମନ ମେଗା ନର୍ସରୀଠାରେ ଆୟୋଜିତ ଜିଲ୍ଲାସ୍ତରୀୟ ପରିବେଶ ଦିବସରେ ବଲାଙ୍ଗିର ବ୍ଲକ ନିମନ୍ତେ ବରକାନି ଗ୍ରାମର ମୂଳବାସିନ୍ଦା ତଥା ପରିବେଶପ୍ରେମୀ, ସାମ୍ବାଦିକ ସତ୍ୟ ସୁନ୍ଦର ଭଞ୍ଜଙ୍କୁ ପରିବେଶ ସୁରକ୍ଷା ଓ ବନ୍ୟପ୍ରାଣୀ ସୁରକ୍ଷା, ପାରମ୍ପରିକ ଜଳାଶୟ ର ରକ୍ଷଣାବେକ୍ଷଣ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ  ସମ୍ମାନଜନକ 'ପ୍ରକୃତି ବନ୍ଧୁ' ପୁରସ୍କାର ପ୍ରଦାନ କରାଯାଇଛି । ସେ ପୂର୍ବରୁ ପରିବେଶ ସୁରକ୍ଷା ପାଇଁ ମୟୁରଭଞ୍ଜରେ ଶିମିଳିପାଳଶ୍ରୀ ସମ୍ମାନ ସହ ବଲାଙ୍ଗିରରେ ବିଜୁ ପଟ୍ଟନାୟକ ଓ୍ବାଇଲଡ୍ ଲାଇଫ ପୂରସ୍କାର-୨୦୧୯, ବିଭିନ୍ନ ସାମାଜିକ ଓ ସାଂସ୍କୃତିକ ଅନୁଷ୍ଠାନ ପକ୍ଷରୁ ସମ୍ମାନୀତ ହେବା ସହ ସମ୍ବନ୍ଧିତ ହୋଇଛନ୍ତି । ଅନେକ ଥର ପ୍ଲାଷ୍ଟିକ ବର୍ଜନ, ଜୈବ ବିବିଧତା ଓ ମୃତ୍ତିକା ସଂରକ୍ଷଣ ଭଳି ବହୁ ବିଧ ପରିବେଶ ସଚେତନତା କାର୍ଯ୍ୟକ୍ରମ କରିଛନ୍ତି । ରାଜ୍ୟ ସରକାରଙ୍କ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗର ଅନୁମୋଦନ କ୍ରମେ ଶ୍ରୀ ଭଞଙ୍କୁ ପ୍ରକୃତି ବନ୍ଧୁ ଭାବେ ଚୟନ କରାଯାଇ ପୁରସ୍କୃତ କରାଯାଇଛି । ଜିଲ୍ଲା ପରିବେଶ ସମିତି ପକ୍ଷରୁ ବଲାଙ୍ଗୀର ସହର ସ୍ଥିତ ମେଗା ନର୍ସରୀଠାରେ ଅନୁଷ୍ଠିତ ବିଶ୍ଵ ପରିବେଶ ଦିବସରେ ମୁଖ୍ୟ ଅତିଥି ଭାବେ ବଲାଙ୍ଗୀର ଜିଲ୍ଲାର ଜିଲ୍ଲାପାଳ  ଚଞ୍ଚଳ ରାଣା, ଏସ୍.ପି ଖିଲାରୀ ଋଷିକେଶ ଦ୍ୟାନ୍ ଦେଓ , ବିଭାଗୀୟ ବନ ଅଧିକାରୀ ନୀତିଶ କୁମାର,  କେନ୍ଦୁଲିଫ୍ ଡିଏଫ୍ ଓ  ରଞ୍ଜିତ କୁମାର ମଲ୍ଲିକ ପ୍ରମୁଖ କାର୍ଯ୍ୟକ୍ରମରେ ଯୋଗ ଦେଇଥିଲେ । ପୁରସ୍କାର ସ୍ବରୂପ ଶ୍ରୀ ଭଞ୍ଜଙ୍କୁ ମାନପତ୍ର ,  ୧୦ ହଜାର ଟଙ୍କାର ଚେକ୍ ପ୍ରଦାନ କରାଯାଇଥିଲା ।