05-Jun-2023

ସମ୍ବଲପୁର (ସଂଜୀବ ପାଣିଗ୍ରାହୀ )
 ଓଡିଶା ସାଂସ୍କୃତିକ ସମାଜର ସ୍ୱାଧୀନତା ସଂଗ୍ରାମୀ ସ୍ମୃତି ଭବନଠାରେ ହୀରାଖଣ୍ଡ ସାମ୍ମୁଖ୍ୟ ଅନୁଷ୍ଠାନର ପ୍ରତିଷ୍ଠା ଦିବସ ପାଳିତ ହୋଇଯାଇଛି। ଅନୁଷ୍ଠାନର ସଭାପତି ଡ. ପରେଶ ଚନ୍ଦ୍ର   ଦାନୀଙ୍କ ପୌରହିତ୍ୟରେ ଆୟୋଜିତ ଏହି ସଭାରେ ମୁଖ୍ୟଅତିଥି ଭାବରେ ଯୋଗଦେଇ ଗୁରୁ ଶ୍ରୀ ରଣଜିତ ନାଗ କହିଥିଲେ ଯେ ହୀରାଖଣ୍ଡ ଅଞ୍ଚଳ ଅନନ୍ୟ କଳା ଓ ସଂସ୍କୃତିର ବାହକ ଅଟେ। ଏହି ଅଂଚଳର ମହାନ ସାଂସ୍କୃତିକ ବୈଭବର ଛଟା ଆଜି ସମଗ୍ର ବିଶ୍ୱରେ ସ୍ୱୀକୃତ ହୋଇ ଆଦର ଲାଭ କରିଛି ତେବେ ଏହାର ସୌରଭ ଆହୁରି ପ୍ରସାରିତ ହେବା ଉଚିତ ଏବଂ ଏହି ଅଂଚଳର ସ୍ୱାଭିମାନକୁ ଉଚିତ ମର୍ଯ୍ୟାଦା ମିଳିବା ଅନିବାର୍ଯ୍ୟ ଏଥି ସକାଶେ ହୀରଖଣ୍ଡ ଆନ୍ଦୋଳନକୁ ତୀବ୍ରରୁ ତୀବ୍ରତର କରିବାକୁ ହେବ ଏବଂ ଶିକ୍ଷା,ଅର୍ଥନୀତି ଠାରୁ ଆରମ୍ଭ କରି କଳା ଓ ସାହିତ୍ଯର ପ୍ରତ୍ୟେକ ବିଭାଗରେ ଚରମ ଲକ୍ଷ୍ୟ ରଖି ଆମକୁ ଆଗକୁ ବଢିବାକୁ ହେବ ବୋଲି ସେ ମତ ଦେଇଥିଲେ। ସଭା ପ୍ରାରମ୍ଭରେ ପଦ୍ମିନୀ ବୈଠାରୁଙ୍କ ନିର୍ଦ୍ଦେଶନାରେ ଗୁରୁ ରତନ କୁମାର ପୂଜାରୀଙ୍କ ରଚିତ ଏକ ଗୀତ ଆକାଂକ୍ଷା ପୂଜାରୀ,ଶ୍ୱେତା ଆଚାରୀ,ଦେବାଶିଷ ଷଢଙ୍ଗୀ,ପ୍ରଜ୍ଞାମୟୀ ମହାରଣା,ସୁଜାତା ମିଶ୍ରଙ୍କ କଣ୍ଠଦାନ ତଥା ପରମ ବୈଭବ ମେହେରଙ୍କ ସଙ୍ଗୀତ ସଂଯୋଜନାରେ  ପରିବେଷିତ ହୋଇଥିଲା।ଉପସଭାପତି ଦୀପକ କୁମାର ପଣ୍ଡା ବାର୍ଷିକ ବିବରଣୀ ଉପସ୍ଥାପନ କରିଥିଲେ। ଅନୁଷ୍ଠାନର ବରିଷ୍ଠ ସଦସ୍ୟ ଅଖିଳ ପଟ୍ଟନାୟକ ହୀରାଖଣ୍ଡ ସମ୍ମାନ ପ୍ରଦାନ କାର୍ଯ୍ଯକ୍ରମକୁ ପରିଚାଳନା କରିଥିଲେ। ଏଥିରେ ଗୁରୁ ଗଙ୍ଗାଧର ଦାସ,ନାଟ୍ୟଶ୍ରୀ ପୁଷ୍ପାଞ୍ଜଳି ବେହେରା,ନାଟ୍ୟକାର ଅତିଶ କୁମାର ଶତପଥୀଙ୍କୁ ତଥା ସମ୍ବଲପୁରର ଅଗ୍ରଣୀ ସାମାଜିକ ଓ ସାଂସ୍କୃତିକ ଅନୁଷ୍ଠାନ ‘ଯୁବଦୟନ’ପାଇଁ ଏହାର ସଭାପତି ସଞୟ କୁମାର ମିଶ୍ରଙ୍କୁ ଏହି ସମ୍ମାନ ପ୍ରଦାନ କରାଯାଇଥିଲା। ପଙ୍କଜିନୀ ମେହେର,ପ୍ରଶାନ୍ତ ପାଟଯୋଶୀ,ରାମାନୁଜ ପଣ୍ଡା ପ୍ରମୁଖ ମାନପତ୍ର ପାଠ କରିଥିଲେ। ଏହି ଅବସରରେ ସମ୍ବଲପୁରୀ କବିତା ପାଠୋତ୍ସବରେ ଭାଗନେଇଥିବା କବି ଓ କବୟିତ୍ରୀମାନଙ୍କୁ ଲଲିତ ମୋହନ ବେବର୍ତ୍ତାଙ୍କ ସଂଯୋଜନାରେ ପ୍ରଶଂସାପତ୍ର ବିତରଣ କରାଯାଇଥିବା ବେଳେ ଡ. ସତ୍ୟନାରାୟଣ ଠାକୁରଙ୍କ ସଂଯୋଜନା ତଥା,ସୁରେଖା ସାହୁ,କାନ୍ତି ମେହେରଙ୍କ ସହଯୋଗରେ ଅନୁଷ୍ଠାନ ତରଫରୁ ହୋଇଥିବା ବିଭିନ୍ନ ପ୍ରତିଯୋଗିତାର କୃତି ପ୍ରତିଯୋଗୀମାନଙ୍କୁ ପୁରସ୍କାର ବଣ୍ଟନ କରାଯାଇଥିଲା।ଶେଷରେ ସଭ୍ୟା ବିଜୟ ଲକ୍ଷ୍ମୀ ବେହେରା ଧନ୍ୟବାଦ ଅର୍ପଣ କରିଥିଲେ।'ଆମର ଭାଷା ସମ୍ବଲପୁରୀ,ଆମର ରାଏଜ୍‌ ହୀରାଖଣ୍ଡ’ ସ୍ଲୋଗାନରେ ସଭାସ୍ଥଳି ଗର୍ଜି ଉଠିଥିଲା।