03-Jun-2023

ବଲାଙ୍ଗିର(ପ୍ରେରଣା ଖବର) - ଓଡ଼ିଶାର ରାଜନୀତି ବଡ ବିଚିତ୍ର ସ୍ଥିତିରେ ରହିଛି । ବହୁତ ବଡ଼ ବଡ଼ ସ୍କେମ୍‌ ଘଟଣାବଳୀ, ଚାଂଚଲ୍ୟକର ଅଘଟଣ ଘଟିଥିବା ସତ୍ତ୍ୱେ ଓଡ଼ିଶାରେ ଦୀର୍ଘ ୨୪ ବର୍ଷ ଧରି ଗୋଟିଏ ଦଳର ଶାସନ ଚାଲିଛି । ପ୍ରତୀୟମାନ ହେଉଛି ସତେ ଯେମିତି ଓଡ଼ିଶାରେ ବିରୋଧୀ ଦଳର କିଛି ସ୍ଥିତି ନାହିଁ । ଜନସାଧାରଣଙ୍କ ଅନେକ ସମସ୍ୟା ଅସମାହିତ ହୋଇ ପଡ଼ିଥିବା ସତ୍ତ୍ୱେ ତଥା ଦେଶର ଅର୍ଥନୈତିକ ମାନଚିତ୍ରରେ ରାଜ୍ୟ ବହୁତ ତଳେ ଥିବା ସତ୍ତ୍ୱେ ସେଭଳି କିଛି ଆଖିଦୃଶିଆ ଜନ ଆଂଦୋଳନ ଦୃଷ୍ଟିଗୋଚର ହେଉ ନାହିଁ । ଶାସନ ବ୍ୟବସ୍ଥା ବିରୁଦ୍ଧରେ ପ୍ରବଳ ଜନମତ ଥିବା ସତ୍ତ୍ୱେ ତାହା ନିର୍ବାଚନରେ ପ୍ରତିଫଳିତ ହେଉନାହିଁ । ଅନ୍ୟପକ୍ଷରେ ରାଜ୍ୟର ପ୍ରମୁଖ ବିରୋଧୀ ଦଳୀୟ ନେତାମାନେ ନିଜ ନିଜର ପୁଅ/ ଝିଅ ମାନଙ୍କ ପାଇଁ ବିଜେଡ଼ିରେ ଟିକଟ କରାଇବାରେ ବ୍ୟସ୍ତ ଥିବାଭଳି ଜଣା ପଡ଼ୁଛି ।
    କୋଶଳାଂଚଳର ଅବସ୍ଥା ଆହୁରି ଶୋଚନୀୟ । ଦେଶର ସର୍ବାଧିକ ଉଗ୍ର ଆଞ୍ଚଳିକ ବୈଷମ୍ୟର ଶୀକାର ହୋଇଥିବା ଏ ଅଂଚଳ ଐତିହାସିକ ଛାତ୍ର ଆନ୍ଦୋଳନ, କୃଷକ ଆନ୍ଦୋଳନ, ବିସ୍ଥାପନ ବିରୋଧୀ ଆନ୍ଦୋଳନ, ଆଦିବାସୀ ଆନ୍ଦୋଳନ ପାଇଁ ଦେଶରେ ଚାଂଚଲ୍ୟ ସୃଷ୍ଟି କରିଥିଲା । ବିଗତ ୩ ଦଶକ ଧରି କ୍ରମାଗତ ଭାବରେ ସ୍ୱତନ୍ତ୍ର କୋଶଳରାଜ୍ୟ ପାଇଁ ଆନ୍ଦୋଳନ ଚାଲି ଆସିଥିଲା । ହାଇକୋର୍ଟବେଂଚ ପାଇଁ ଲଗାତାର ଭାବରେ ଆଇନଜୀବୀ ଆନ୍ଦୋଳନ ବ୍ୟବସ୍ଥାକୁ ସ୍ଥାଣୁକରି ଦେଇଥିଲା । କିନ୍ତୁ ଆଜି ସେ ସମସ୍ତ ଆନ୍ଦୋଳନ ଇତିହାସ ହୋଇ ଯିବାକୁ ବସିଲେଣି ବୋଲି ବିଶିଷ୍ଟ କୋଶଳବଦୀ ନେତା ପ୍ରମୋଦ ମିଶ୍ର ଏକ ସାମ୍ବାଦିକ ସମ୍ମିଳନୀରେ କହିଛନ୍ତି । ଆଜି ସ୍ଥାନୀୟ ସାମ୍ବାଦିକ ଭବନ ଠାରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ଯୋଗ ଦେଇ ଶ୍ରୀ ମିଶ୍ର ଜନତା ଓ ରାଜନୈତିକ ସଂଗଠକ ମାନଙ୍କୁ ଜଗିବା ପାଇଁ, ରାଜନୈତିକ ସଂଗଠକମାନେ ଏହି ପରିବବାରବାଦୀ ରାଜନେତା ଓ ତାଙ୍କ ପରିବାରର ଗୋଲାମ୍ ହେବା ପରିବର୍ତ୍ତେ ନିର୍ବାଚନ ଟିକଟ୍ ଦାବୀଦାର ହୁଅନ୍ତୁ ବୋଲି କହିଛନ୍ତି । ଆଉ ସାଧାରଣ ଜନତା କ୍ଷମତାଲିପ୍‌ସୁ ଏହି ପରିବାରବାଦୀ ରାଜନୈତିକ ନେତାମାନଙ୍କୁ ପରାହତ କରି ସକ୍ଷମ ଓ ସ୍ୱଚ୍ଛ ସଂଗଠକ ମାନଙ୍କ ଇତିହାସ ଦେଖି ନିର୍ବାଚିତ କରାନ୍ତୁ ବୋଲି ଶ୍ରୀ ମିଶ୍ର ସମସ୍ତଙ୍କୁ ଅନୁରୋଧ କରିଛନ୍ତି । 
 । 
  

ଅବସ୍ଥା ଏଭଳି ହେଲା ଯେ ଏହି ପରିବାର ମାନଙ୍କ ପାଇଁ ଦଳ ଆଦର୍ଶ କିମ୍ବା ନୀତିର କିଛି ମର୍ଯ୍ୟାଦ ରହିଲା ନାହିଁ । କ୍ଷମତା ଓ ବ୍ୟବସାୟ ହିଁ ଏମାନଙ୍କ ସର୍ବସ୍ୱ ହୋଇଗଲା । ରାଜନୀତିର ଦୂରାବସ୍ଥା ଏଭଳିହୋଇଛି ଯେ କ୍ଷମତା ରାଜନୀତିର ପେଣ୍ଡୁଲମ୍ ଏହି ପରିବାରମାନଙ୍କ ମଧ୍ୟରେ ହିଁ ଦୋହଲୁଛି । ବିଗତ ଦିନରେ ଏ ଅଂଚଳରେ ଦେଖା ଦେଇଥିବା ଜମିସ୍କେମ୍‌, ଅପରାଧିକ ଅବସ୍ଥା, ମଦ, ସଟ୍ଟା, ଚାଉଳ ରିସାଇକ୍ଲିଂ ଘଟଣା, ମ୍ୟୁନିସିପାଲିଟି ଦୁର୍ନୀତି, ଟେଣ୍ଡର ଫିକ୍‌ସିଂଗ୍‌, ଦାଦନ ବ୍ୟବସାୟ ଯେତେସବୁ ଅପରାଧିକ ଘଟଣାବଳୀର ସୂତା ଏହି ରାଜନୈତିକ ପରିବାର ମାନଙ୍କ ଲୁଗାରେ ଲାଗିଛି । ଆଶ୍ଚର୍ଯ୍ୟର କଥା ଏହି ଯେ, ପ୍ରଶାସନ ଓ ସରକାର ମଧ୍ଯ ପ୍ରତ୍ୟକ୍ଷ କିମ୍ବା ପରୋକ୍ଷରେଏହି ରାଜନୈତିକ ପରିବାରମାନଙ୍କୁ ଘଂଟ ଘୋଡ଼ାଉଛନ୍ତି । ଅବସ୍ଥା ଏଭଳି ଯେ ଅବିଭକ୍ତ ବଲାଙ୍ଗିର ଜିଲ୍ଲାର ସବୁ ପ୍ରମୁଖ ରାଜନୈତିକ ପରିବାର ଗୋଟିଏ ଗୋଟିଏ ଦଳକୁ ଆବୋରି ବସିଛନ୍ତି । ଆଉ ସେହି ଦଳ ସବୁ ତିଆରି କରିଥିବା ସଂଗଠକମାନେ ଆଜି କଣଠେସା ହୋଇଛନ୍ତି ବୋଲି ଏହି ସାମ୍ବାଦିକ ସମ୍ମିଳନୀରେ ଶ୍ରୀ ମିଶ୍ର ସୂଚନା ଦେଇଛନ୍ତି । ସବୁଠାରୁ ଆଶ୍ଚର୍ଯ୍ୟର କଥା ହେଲା ଯେ ନୀତି / ଆଦର୍ଶର କଥା କହୁଥିବା କିଛି ବୁଦ୍ଧିଜୀବୀ ଓ ସମାଜିକ ସଂଗଠକମାନେ ମଧ୍ୟ ଏମାନଙ୍କ ଅପରାଧର ସହଯୋଗୀ ସାଜିଛନ୍ତି । ଏବେ ଏହି ରାଜନୈତିକ ପରିବାରମାନଙ୍କ ମୁଖିଆମାନେ ସମସ୍ତେ ନିଜ ନିଜ ପୁଅ ମାନଙ୍କୁ ଶାସକ ଦଳର ଟିକଟ କରାଇବାରେ ଲାଗିଗଲେଣି । ଏବେ ପ୍ରଶ୍ନଉଠୁଛି । ଯଦି ଏଭଳି ଅବସ୍ଥା ହୁଏ ତେବେ ଏ ଅଂଚଳର ସମସ୍ୟା ସବୁ କିଭଳି ଭାବରେ ସମାହିତ ହେବ ଏବଂ ରାଜନୈତିକ ଅଭିପ୍ରାୟ ନେଇ ସଂଗଠନ କରିଥିବା ଦଳୀୟ ସଂଗଠକମାନଙ୍କ ଅବସ୍ଥା କ’ଣ ହେବ ବୋଲି ଏହି ସାମ୍ବାଦିକ ସମ୍ମିଳନୀ ମାଧ୍ୟମରେ ପ୍ରଶ୍ନ କରିଛନ୍ତି କୋଶଳବାଦୀ ନେତା ପ୍ରମୋଦ ମିଶ୍ର ।