03-Jun-2023

ସମ୍ବଲପୁର, (ସଂଜୀବ ପାଣିଗ୍ରାହୀ )
 ସ୍ଥାନୀୟ ସାମ୍ବାଦିକ ଭବନଠାରେ ଅନ୍ୟା ସାହିତ୍ୟାନୁଷ୍ଠାନ ପକ୍ଷରୁ ସାହିତ୍ୟିକ ଅଭୟ କୁମାର ପାଢୀଙ୍କ ସ୍ମୃତିରେ  ‘ସ୍ମୃତିରେ ଅଭୟ’ କାର୍ଯ୍ୟକ୍ରମ ଆୟୋଜିତ ହୋଇଯାଇଛି। କବି ଡ. ପ୍ରଦୀପ କୁମାର ପଣ୍ଡାଙ୍କ ଅଧ୍ଯକ୍ଷତାରେ ଆୟୋଜିତ ହୋଇଥିବା ଏହି ସଭାରେ ଆଲୋଚକ ଭାବରେ ଯୋଗଦେଇ କବି ସରୋଜ ଅଭୟ କୁମାର ପାଢୀଙ୍କ କାବ୍ୟ ସୃଷ୍ଟି ଉପରେ ଆଲୋଚନା କରି କହିଥିଲେ ଯେ,ସ୍ୱର୍ଗୀୟ ଅଭୟ ପାଢୀଙ୍କ କବିତାରେ ଦର୍ଶନ ସହ ଜୀବନର ରହସ୍ୟ ଓ ମଣିଷ ହେଜୁଥିବା ଅନେକ ପ୍ରଶ୍ନର ଅନ୍ୱେଷା ରହିଛି। ରାଜକୀୟ ଠାଣି ସତ୍ତ୍ୱେ ଏକ କବିର କୋମଳ ମନ ନଈ ଭଳି ତାଙ୍କ ଭିତରେ ବହୁଥିଲା। ଆଭିଜାତ୍ୟ ଓ ମଧ୍ୟବିତ୍ତ ବର୍ଗର ଜୀବନରେ ଥିବା ଦ୍ୱନ୍ଦ୍ୱ,ସଂଘାତ ଓ ବିଡମ୍ବନାକୁ ସେ ତାଙ୍କ କବିତାରେ ରୂପ ଦେଇଥିବା ଦର୍ଶାଇ କବି ସରୋଜ ସ୍ୱର୍ଗତ ପାଢୀଙ୍କ ଏକ ବକ୍ତବ୍ୟ ଉଦ୍ଧାର କରି କହିଥିଲେ ଯେ,ସତ୍ୟକୁ ଶବ୍ଦରେ କହିହୁଏ ନାହିଁ ତାହା ଏକ ଅନୁଭବର ବିଷୟ। ଏହି ଅବସରରେ ଆୟୋଜିତ ଡ. ଗୌରିଦାସ ପ୍ରଧାନଙ୍କ ସଂଯୋଜନାରେ  ଏକ କବିତା ଆସରରେ ରୀତାରାଣୀ ମିଶ୍ର,ପ୍ର. ମୀନକେତନ ପାଠୀ,ଡ. ଗିରିଜା ଶଙ୍କର ଶର୍ମା,ଡ. ସତ୍ୟନାରାୟଣ ଠାକୁର,ମମତା ନାଥ,ଲଲିତ ମୋହନ ବେବର୍ତ୍ତା,ବବଲୁ ବାଗ,ଦେବାର୍ଚ୍ଚନ ଠାକୁର,କମଳ ଲୋଚନ ପଣ୍ଡା ପ୍ରମୁଖ କବିତା ପାଠ କରିଥିଲେ।ଡ.ଶ୍ୟାମ ସୁନ୍ଦର ଧର,ଡ. ଦ୍ୱାରିକାନାଥ ନାୟକ  ଗୀତ ଗାନ କରିଥିଲେ।ଦୀପକ ପଣ୍ଡା,କ୍ଷେତ୍ରମଣି ବିଭାର,ତଫିଜୁଲ୍‌ ହୋସେନ ପ୍ରମୁଖ ସାହିତ୍ଯ ପ୍ରେମିଗଣ ସଭାରେ ଉପସ୍ଥିତ ଥିଲେ।  ବୃନ୍ଦାବନ ମିଶ୍ର,ଡ. ଗୋବିନ୍ଦ ମହାରଣା, ରମେଶ ଚନ୍ଦ୍ର ମିର୍ଦ୍ଧା କାର୍ଯ୍ୟକ୍ରମରେ ସହଯୋଗ କରିଥିଲେ। ପ୍ରକାଶ ଥାଉକି ସଭା ପୂର୍ବରୁ ନିକଟ ଅତୀତରେ ସ୍ୱର୍ଗ ଲାଭ କରିଥିବା  ସାହିତ୍ୟିକ ଧରଣୀଧର ପ୍ରଧାନଙ୍କ ଆତ୍ମାର ସଦ୍‌ଗତି କାମନା କରି ନିରବ ପ୍ରାର୍ଥନା କରାଯାଇଥିଲା। ଶେଷରେ ଡ. ସିଦ୍ଧାର୍ଥ ପଣ୍ଡା ଧନ୍ୟବାଦ ଅର୍ପଣ କରିଥିଲେ।