15-May-2023

ଗ୍ରୀଷ୍ମ ଋତୁ ରେ ବାଟୋଇ ମାନଙ୍କର ତୃଷ୍ଣା ମେଣ୍ଟାଇବା ନିମନ୍ତେ ସରକାର କୋଟି କୋଟି ଟଙ୍କା ବିନିଯୋଗ କରି ପଞ୍ଚାୟତ ମାନଙ୍କ ଜରିଆରେ ଜଳଛତ୍ର ର ବ୍ୟବସ୍ଥା କରିଛନ୍ତି। କିନ୍ତୁ ପ୍ରଚଣ୍ଡ ରୁଦ୍ର ତାପରେ ରହି ଯେଉଁ ବ୍ୟକ୍ତି ମାନେ ଜଳଛତ୍ର ରେ ରହି ଲୋକଙ୍କୁ ପିଇବା ପାଣି ଯୋଗାଇ ଦେଉଛନ୍ତି ସେମାନଙ୍କୁ ପଞ୍ଚାୟତ ଅଧିକାରୀ ମାନେ ଶୋଷଣ କରୁଥିବା ଦେଖିବାକୁ ମିଳୁଛି। ସୂଚନା ଅନୁସାରେ ବଲାଙ୍ଗୀର ଜିଲ୍ଲା ମୁରିବାହାଲ ବ୍ଳକ ବଡ଼ ସାଇମରା ପଞ୍ଚାୟତ ର ଅଣ୍ଡାଲଦରୋ ଗାଁ ରେ ବାଟୋଇ ପାଇଁ ଜଳଛତ୍ର ରେ ପାଣି ଯୋଗାଉଛନ୍ତି ଶୁକାନ୍ତି ବାଗ ।ଶୁକାନ୍ତି ବାଗ ଙ୍କ ସ୍ବାମୀ ବିଗତ ତିନି ବର୍ଷ ତଳେ ମୃତ୍ୟୁବରଣ କରିଥିବାବେଳେ ଆଜି ପର୍ଯ୍ୟନ୍ତ ସେ ବିଧବା ଭତ୍ତା ପାଇବାରୁ ବଞ୍ଚିତ ଅଛନ୍ତି। ତାଙ୍କ ଝିଅକୁ ଅନ୍ୟତ୍ର ବାହା ଦେଇ ସେ ଏବେ ଏକାକୀ ବାସ କରୁଥିବା ବେଳେ ସରକାରୀ ସହାୟତା କହିଲେ ମାତ୍ର ଚାଉଳ ୫ କେଜି । ସେହି ପାଞ୍ଚ କିଲୋଗ୍ରାମ ଚାଉଳ ସେ କିପରି ମାସ ବିତାଉଛନ୍ତି ତାହା ଚିନ୍ତା କରନ୍ତୁ। ଏପରି କି ସେ ଦୁର୍ବଳ ଥିବା ଯୋଗୁଁ କେହି ତାକୁ ମୂଳ ଲାଗିବା ପାଇଁ ଡାକନ୍ତି ନାହିଁ ।ସେ ନିଜ ପେଟପାଟଣା ପାଇଁ ଖରାଦିନେ ଜଳଛତ୍ର ରେ ପାଣି ଯୋଗାଉଛନ୍ତି ହେଲେ ସେଠାରେ ତାଙ୍କୁ ଠିକ ମୂଲ୍ୟରେ ପ୍ରାପ୍ୟ ମିଳୁନାହିଁ। ତାଙ୍କ କହିବା ଅନୁଯାୟୀ ଗତବର୍ଷ ଏପ୍ରିଲ ୧ ରୁ ଜୁନ ୧୫ ପର୍ଯ୍ୟନ୍ତ ସେ ପାଣିଛତ୍ର ଦେଇଥିଲେ କିନ୍ତୁ ତାଙ୍କୁ ମାତ୍ର ଦଶ ହଜାର ଟଙ୍କା ପ୍ରଦାନ କରିଥିଲେ ସ୍ଥାନୀୟ ସରପଞ୍ଚ ଶୁକମଣୀ ପୁଟେଲ । ସରକାରୀ ନିୟମାନୁସାରେ ଯେଉଁ ବ୍ୟକ୍ତି ଜଳଛତ୍ର ଦେଇଛି ତାକୁ ମନରେଗା ଯୋଜନାରେ ଯେପରି ଦୈନିକ ମଜୁରୀ ନିର୍ଦ୍ଧାରଣ କରିଛି ସେହି ପରିପ୍ରେକ୍ଷୀରେ ଦୈନିକ ମଜୁରୀ ଦିଆଯାଏ ଓ ଏହା ଏକାଉଣ୍ଟ୍ ମାଧ୍ୟମରେ ଦିଆଯିବାକୁ ଆଦେଶ କରାଯାଇଛି। କିନ୍ତୁ ସରପଞ୍ଚ ଓ ପିଇଓ ନିଜ ଲାଭ ପାଇଁ ହିତାଧିକାରୀ ମାନଙ୍କ ଏକାଉଣ୍ଟ୍ ନନେଇ ନିଜ ଏକାଉଣ୍ଟ୍ ରେ ଟଙ୍କା ଉଠାଇ ହଡ଼ପ କରିଥିବା ସ୍ପଷ୍ଟ ବାରି ହେଉଛି। ଏହାକୁ ମୁରିବାହାଲ ଗୋଷ୍ଠୀ ଉନ୍ନୟନ ଅଧିକାରୀ ଓ ଟିଟିଲାଗଡ ଉପଜିଲ୍ଲାପାଳ ଧ୍ୟାନ ଦେବା ସହ ଉଚିତ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।

(ପୂର୍ଣ୍ଣ ଶଶୀ ଶେଖର ରାଓ ଙ୍କ ରିପୋର୍ଟ )