03-Dec-2025

ବୌଦ୍ଧ(ପ୍ରେରଣାଖବର): ଜିଲ୍ଲା ଜର୍ଣ୍ଣାଲିଷ୍ଟ ଫୋରମ୍‌ ତରଫରୁ ଆୟୋଜିତ ବିଂଶତମ ବୌଦ୍ଧ ପୁସ୍ତକମେଳାର ଆଜି ଦ୍ୱିତୀୟ ସନ୍ଧ୍ୟାରେ ଇନଟାକ୍‌, ବୌଦ୍ଧ ଚାପ୍ଟର ତରଫରୁ ‘ବୌଦ୍ଧଜିଲ୍ଲାର ଐତିହ୍ୟ ଓ ସଂସ୍କୃତି’ ଉପରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି । ଇନଟାକ୍‌ ବୌଦ୍ଧ ଚାପ୍ଟର ଆବାହକ ବିଶ୍ୱେଶ୍ୱର ପୃଷ୍ଟିଙ୍କ ଆବାହକତ୍ୱରେ ଏହି ଆଲୋଚନାରେ ଭୈରବୀ ମହାବିଦ୍ୟାଳୟ ପୁରୁଣାକଟକର ଇତିହାସ ବିଭାଗର ବରିଷ୍ଠ ଅଧ୍ୟାପକ ଲଳିତ କୁମାର ମେହେର ବୌଦ୍ଧ ଅଞ୍ଚଳରେ ବୌଦ୍ଧ ଧର୍ମର ଉନ୍ମେଷ, କୀର୍ତ୍ତିରାଜି ଉପରେ ବକ୍ତବ୍ୟ ରଖିଥିବାବେଳେ ଗନ୍ଧରାଡି ମହାବିଦ୍ୟାଳୟର ଅଧ୍ୟକ୍ଷ ତଥା ଇତିହାସ ଅଧ୍ୟାପକ ପ୍ରଭାତ କୁମାର ଶତପଥୀ ଗନ୍ଧରାଡୀର ହରିହର ଉପାସନା ଜିଲ୍ଲାର ଶୈବ-ବୈଷ୍ଣବ ସମନ୍ୱୟ ଉପରେ ଆଲୋକପାତ କରିଥିଲେ । ଅନ୍ୟତମ ବକ୍ତା ଡଃ ଦିବ୍ୟରଞ୍ଜନ ତ୍ରିପାଠୀ ବୌଦ୍ଧ ଅଞ୍ଚଳରେ ତନ୍ତ୍ର ସାଧନା ଶାକ୍ତ ଉପାସନା ତତ୍‌ ସଙ୍ଗେସଙ୍ଗେ ଶକ୍ତି ସଂପର୍କୀତ ପାଳନ କରାଯାଉଥିବା  ପୂଜା ଯାନିଯାତ୍ରା ଉପରେ ତାଙ୍କର ଗବେଷଣାତ୍ମକ ସନ୍ଦର୍ଭ ଉପସ୍ଥାପନା କରି ଥିଲେ । ଶେଷରେ ମହିମାଧର୍ମର ଖାଦ୍ୟପୀଠ ଓ ପାତାଳୀ ଶ୍ରୀକ୍ଷେତ୍ର ନାଏକପଡା ଗୁଂଫା ସମ୍ବନ୍ଧରେ ବିଶ୍ୱେଶ୍ୱର ପୃଷ୍ଟି ତାଙ୍କର ବକ୍ତବ୍ୟ ରଖିଥିଲେ । ଏହି ଅବସରରେ ଡଃ ଦିବ୍ୟରଞ୍ଜନ ତ୍ରିପାଠୀଙ୍କୁ ତାଙ୍କର ଗବେଷଣା ଲବ୍ଧ ଡକ୍ଟରେଟ ସମ୍ମାନ ପାଇଥିବାରୁ ଇନଟାକ ତରଫରୁ ତାଙ୍କୁ ସମ୍ବର୍ଦ୍ଧନା ପ୍ରଦାନ କରାଯାଇଥିଲା । କାର୍ଯ୍ୟକ୍ରମରେ ଫୋରମ୍‌ର ବରିଷ୍ଠ ସଦସ୍ୟ ସତ୍ୟନାରାୟଣ ପାଣି ଅତିଥି ପରିଚୟ ପ୍ରଦାନ କରି ଥିବାବେଳେ ଇନଟାକ୍‌ ବୌଦ୍ଧ ଚାପ୍ଟରର ଯୁଗ୍ମ ଆବାହକ  ଦିବ୍ୟ

ରଞ୍ଜନ ପଟ୍ଟନାୟକ ମଂଚ ପରିଚାଳନା କରିବାସହିତ ଧନ୍ୟବାଦ ଅର୍ପଣ କରିଥିଲେ । ଏହାପରେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ବାଉଁଶୁଣୀ ସାଂସ୍କୃତିକ ପରିଷଦ, ସୃଷ୍ଟି ଡ୍ୟାନ୍ସ ଏକାଡେମୀ, ସମ୍ବଲପୁରୀ ଲୋକନୃତ୍ୟ ଦିବାକର ବଘାର ଏବଂ ସାଥୀ କଣ୍ଟାମାଳ ସାଂସ୍କୃତିକ ଦଳ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ ।  ଆଜି ଦ୍ୱିତୀୟ ସନ୍ଧ୍ୟାରେ ପୁସ୍ତକମେଳା ପଡିଆରେ ବହୁ ସଂଖ୍ୟାରେ ଦର୍ଶକ, ପୁସ୍ତକପ୍ରେମୀ ଉପସ୍ଥିତ ରହି ପୁସ୍ତକ କିଣିବା ସହିତ ସାଂସ୍କୃତିକ କାର୍ଯ୍ୟକ୍ରମକୁ ଉପଭୋଗ କରିଥିଲେ ।