02-Dec-2025

ବଲାଙ୍ଗୀର, ଆଲ୍ ଓଡ଼ିଶା ଆୟୁଷ ଷ୍ଟୁଡେଣ୍ଟସ୍ ଏସୋସିଏସନ୍ ର ଡାକରାରେ ଗତ ୨୪ ତାରିଖରୁ ବଲାଙ୍ଗୀର ଆୟୁର୍ବେଦିକ କଲେଜର ଆୟୁଷ ବିଭାଗର ଛାତ୍ରଛାତ୍ରୀ ମାନେ କଲେଜ ସମ୍ମୁଖରେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣାରେ ବସିଛନ୍ତି । ନିଜର କିଛି ଦାବିକୁ ନେଇ ରାଜ୍ୟରେ ଥିବା ସମସ୍ତ ଏ ପର୍ଯ୍ୟନ୍ତ ଆୟୁର୍ବେଦିକ କଲେଜର ଆୟୁସ ଛାତ୍ରଛାତ୍ରୀ ମାନେ ନିଜ ନିଜ କଲେଜ ଗେଟ୍ ସମ୍ମୁଖରେ ଧାରଣାରେ ବସିଥିବା ବେଳେ ରାଜ୍ୟ ଓ କେନ୍ଦ୍ରରେ କ୍ଷମତାସୀନ ବିଜେପି ସରକାର ଛାତ୍ରଛାତ୍ରୀ ମାନଙ୍କ ଦାବିକୁ ଅଣଦେଖା କରିଚାଲିଛନ୍ତି ବୋଲି ଅଭିଯୋଗ ହୋଇଛି । ସ୍ଥାୟୀ ଆୟୁର୍ବେଦିକ ଡାକ୍ତର ପଦବୀ ସୃଷ୍ଟି, ଆୟୁଷ ଛାତ୍ରଛାତ୍ରୀ ମାନଙ୍କ ଇନଟେନସିଭ୍ କୁ ସଠିକ ସମୟରେ ସାରିବା, ଷ୍ଟାଇଫେଣ୍ଡ ବୃଦ୍ଧି ଏବଂ ରାଜ୍ୟର ସମସ୍ତ ଆୟୁଷ କଲେଜରେ ଏନ୍‌ସିଆଇଏସ୍‌ଏମ(NCISM) ଗାଇଡଲାଇନ୍ କୁ ପାଳନ କରିବା ଆଦି ଦାବି ନେଇ ଛାତ୍ରଛାତ୍ରୀ ମାନେ ୯ଦିନ ହେଲା ଧାରଣାରେ ବସିଛନ୍ତି । 

ଛାତ୍ରଛାତ୍ରୀ ମାନଙ୍କ ଦାବିକୁ କଂଗ୍ରେସ ଦଳ ସମେତ ଜିଲ୍ଲା ଓକିଲ ସଂଘ ଓ ଅନ୍ୟାନ୍ୟ ସଂଗଠନ ମାନେ ସମର୍ଥନ କରିଥିବା ବେଳେ ଆଜି ବଲାଙ୍ଗୀର ନାଗରିକ କମିଟିର ଏକ ପ୍ରତିନିଧି ଦଳ ଧାରଣାରତ ଛାତ୍ରଛାତ୍ରୀ ମାନଙ୍କ ସହ ସାମିଲ ହୋଇଥିଲେ । କମିଟିର ସଭାପତି ଡ. ଶ୍ରୀକର ମିଶ୍ର ଛାତ୍ରଛାତ୍ରୀ ମାନଙ୍କ ଦାବିକୁ ସମର୍ଥନ ଜଣାଇ ରାଜ୍ୟ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଉଦ୍ଦେଶ୍ୟରେ ବଲାଙ୍ଗୀର ଜିଲ୍ଲାପାଳ ଗୌରବ ଶିବାଜୀ ଇଶଲୱାରଙ୍କୁ ଏକ ସ୍ମରକପତ୍ର ପ୍ରଦାନ କରିବା ସହ ଆଗାମୀ ଦିନରେ ସରକାର ଏହି ଏହାକୁ ଗୁରୁତର ସହ ଗ୍ରହଣ କରିବା ପାଇଁ ଅନୁରୋଧ କରିଛନ୍ତି । ସୂଚନାଯୋଗ୍ୟ ଯେ, ନେସନାଲ ଆୟୁସ ମିସନ୍‌ର ଗାଇଡଲାଇନ୍ ଅନୁଯାୟୀ ସରକାର ବିଭିନ୍ନ ମେଡିକାଲ ପଦପଦବୀ ସୃଷ୍ଟି କରିବା କଥା ତେବେ ଆୟୁର୍ବେଦିକ କଲେଜ ଛାତ୍ରଛାତ୍ରୀଙ୍କ ଅଭିଯୋଗ ହେଲ, ଦୀର୍ଘ ୨୩ ବର୍ଷ ହେଲା ସରକାର ସ୍ଥାୟୀ ଆର‌୍ୟୁବେଦିକ ମେଡିକାଲ ଅଫିସର ପଦବୀ ସୃଷ୍ଟି କରି ନାହାନ୍ତି । ଏହି ସବୁ ଦାବିକୁ ନେଇ ମେଡିକାଲ ଛାତ୍ରଛାତ୍ରୀ ମାନେ ଧାରଣାରେ ବସିଥିବା ବେଳେ ଏ ପର୍ଯ୍ୟନ୍ତ ରାଜ୍ୟସରକାରଙ୍କ ତରଫରୁ କୌଣସି ନିର୍ଦ୍ଦିଷ୍ଟ ପ୍ରତିଶୃତି ନମିଳିବା ଛାତ୍ରଛାତ୍ରୀଙ୍କ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି ।