02-Nov-2025

 ବଲାଙ୍ଗୀର (ପ୍ରେରଣା ଖବର): ବଲାଙ୍ଗୀର ଦିନ୍ ଆୟୋଜକ କମିଟି ତରଫରୁ ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ନଭେମ୍ବର ୧ ତାରିଖକୁ ବଲାଙ୍ଗୀର ଦିନ୍ ଭାବରେ ଧୁମଧାମର ସହ ପାଳନ କରାଯାଇଛି । ସକାଳେ ଅନୁଷ୍ଠିତ ସାଂସ୍କୃତିକ ଶୋଭାଯାତ୍ରରେ ଜିଲ୍ଲାର ବିଭିନ୍ନ ସାଂସ୍କୃତିକ ଦଳ ଏବଂ ଶତାଧିକ କଳାକାରଙ୍କ ସମେତ ବଲାଙ୍ଗୀର ଦିନ୍ ଆୟୋଜକ କମିଟିର ସଭ୍ୟସଭ୍ୟା ସାମିଲ ହୋଇଥିଲେ । ସଂଧ୍ୟାରେ ଅନୁଷ୍ଠିତ ସଭାରେ ମୁଖ୍ୟ ଅତିଥି ଭାବରେ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓ ଯୋଗ ଦେଇ ଆମ ସମସ୍ତଙ୍କ ସହଯୋଗରେ ବଲାଙ୍ଗୀରର ବିକାଶ ସମ୍ଭବ ହୋଇପାରିବ ବୋଲି କହିଥିଲେ ।  ଦଳମତ ନିର୍ବିଶେଷରେ ଆମେ ସମସ୍ତେ ବିକାଶକୁ ଆଗରେ ଓ ଦଳକୁ ପଛରେ ରଖି କାମ କରିବାକୁ ପଡ଼ିବ ବୋଲି କହିଥିଲେ l ବଲାଙ୍ଗୀର ଦିନ ଆୟୋଜନ ପାଇଁ ମାନ୍ୟବର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସରକାରୀ ଅନୁଦାନ ଦେବା ପାଇଁ ନିଶ୍ଚିତ କରିଛନ୍ତି ବୋଲି ଉପମୁଖ୍ୟମନ୍ତ୍ରୀ ଶ୍ରୀ ସିଂହଦେଓ କହିଥିଲେ l ସମ୍ମାନିତ ଅତିଥି ଭାବରେ ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ, ବଲାଙ୍ଗୀର ଜିଲ୍ଲା ପରିଷଦ ଅଧ୍ୟକ୍ଷା ଦେବକୀ ସାହୁ, ଉତ୍ତରାଂଚଳ ଆଇଜି ହିମାଂଶୁ ଲାଲ, ବଲାଙ୍ଗୀର ମୁନିସିପାଲିଟି ପୌରାଧ୍ୟକ୍ଷା ଶ୍ରୀମତୀ ଲିକା ସାହୁ, ବଲାଙ୍ଗୀର ଜିଲ୍ଲାପାଳ ଗୌରବ ଶିବାଜୀ ଇସଲବାର, ବଲାଙ୍ଗୀର ଏସ୍‌ପି ଅଭିଳାଷ ଜୀ ପ୍ରମୁଖ ମଂଚାସୀନ ରହି ବଲାଙ୍ଗୀରର ବିକାଶ ପାଇଁ ସମସ୍ତ ପ୍ରକାର ସହଯୋଗ ପାଇଁ ନିଜର ସମର୍ଥନ ଜଣାଇଥିଲେ। ବଲାଙ୍ଗୀର ଦିନ୍ ଆୟୋଜକ କମିଟି ର ଅଧ୍ୟକ୍ଷ ଗୋପାଳଜୀ ପାଣିଗ୍ରାହୀଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାରେ କମିଟିର ସଭ୍ୟ ବିଧୁଭୂଷଣ ତ୍ରିପାଠୀ ଧନ୍ୟବାଦ ଅର୍ପଣ କରିଥିଲେ l

ସଭ୍ୟ ଦୀନେଶ ଶର୍ମା, ଗୋପାଳ ପ୍ରଧାନ ପ୍ରମୁଖ ମଂଚାସୀନ ଥିଲେ । ଏହି ଅବସରରେ ବଲାଙ୍ଗୀର ଦିନ୍ ଆୟୋଜକ କମିଟି ତରଫରୁ ଏକ ସ୍ମରଣୀକା ପ୍ରକାଶ ପାଇଥିଲା । ପୂର୍ବରୁ ଅନୁଷ୍ଠିତ ବିଭିନ୍ନ ପ୍ରତିଯୋଗିତାର କୃତୀ ପ୍ରତିଯୋଗୀ ମାନଙ୍କୁ ମଂଚରେ ପୁରସ୍କୃତ କରାଯାଇଥିଲା । ପରେ ବିଭିନ୍ନ କ୍ଷେତ୍ରରେ ବଲାଙ୍ଗୀର ମାଟି ପାଇଁ ଗୌରବ ଅଣିଥିବା କିଛି ବ୍ୟକ୍ତିବିଶେଷଙ୍କୁ ସମ୍ବର୍ଦ୍ଧିତ କରାଯାଇଥିଲା । ବଲାଙ୍ଗୀର ଦିନ୍ ଆୟୋଜକ କମିଟି ର ସଭ୍ୟ ଲୋଟସ ଷଡଙ୍ଗୀ କାର୍ଯ୍ୟକ୍ରମକୁ ସଂଯୋଜନା କରିଥିଲେ । ସଭା ପରେ ସମ୍ବଲପୁରୀ ଗାୟକ ରୁନା ସୁନାଙ୍କ ଗୀତରେ ଦର୍ଶକ ମାନେ ଝୁମିଥିଲେ । ପରେ ଗାୟକ ପଙ୍କଜ ଜାଲ, ବ୍ୟାସଦେବ ପୁରୋହିତପ୍ରମୁଖ ସମ୍ବଲପୁରୀ ଗୀତ ପରିବେଷଣ କରି ଦର୍ଶକଙ୍କ ଭରପୁର ମନୋରଂଜନ କରିଥିଲେ । ଏହି କାର୍ଯ୍ୟକ୍ରମକୁ ସଫଳ କରିବାରେ ବଲାଙ୍ଗୀର ଦିନ୍ ଆୟୋଜକ କମିଟି ର ସମସ୍ତ ସଭ୍ୟ ସଭ୍ୟା ସହଯୋଗ କରିଥିଲେ ।