17-Feb-2025

ଯାଜପୁର, ବରୀ ବ୍ଲକ ବାଲିଆ ସ୍ଥିତ ଅଭିମନ୍ୟୁ ସାମନ୍ତସିଂହାର ମହାବିଦ୍ୟାଳୟର ଜନୈକ ଛାତ୍ରୀଙ୍କୁ ଅସଦାଚରଣ ଅଭିଯୋଗରେ ଅଭିଯୁକ୍ତ ଅଧ୍ୟାପକ ଓ ଅଧ୍ୟକ୍ଷ ଏବେବି ଫେରାର ଅଛନ୍ତି । ଉଭୟ ଅଭିଯୁକ୍ତଙ୍କୁ ବରୀ ପୋଲିସ ଗିରଫ କରିବାରେ ସକ୍ଷମ ହୋଇନାହିଁ । ଏ ନେଇ ପୂର୍ବରୁ ବରୀ ବିଜେଡି ପକ୍ଷରୁ ବରୀ ଥାନା ଘେରାଉ କରାଯାଇଥିଲା । ଆଜି ପୁନର୍ବାର ବିଧାୟକ ବିଶ୍ୱରଞ୍ଜନ ମଲ୍ଲିକଙ୍କ ନେତୃତ୍ୱରେ ବରୀ ଥାନା ଘେରାଉ କରାଯାଇଥିଲା । ବିଧାୟକଙ୍କ ସହିତ ବିଜେଡି ବ୍ଲକ ସଭାପତି କେଦାର ସାମଲ, ଜିଲ୍ଲା ପରିଷଦ ସଭ୍ୟ ଅଶୋକ ସାମଲ, ଦିଲ୍ଲୀପ ମହାନ୍ତି  ପ୍ରମୁଖ ଶତାଧିକ ବିଜେଡି ନେତା ଓ କର୍ମୀ ଯୋଗଦେଇଥିଲେ । ଯାଜପୁର ଅତିରିକ୍ତ ଏସପି ଶୀତିକଣ୍ଠ କାନୁନଗୋ ବରୀ ଥାନାରେ ଉପସ୍ଥିତ ରହି ଆଲୋଚନା କରିଥିଲେ ।

(ରଞ୍ଜିତ ମହାନ୍ତିଙ୍କ ରିପୋର୍ଟ)