16-Feb-2025

ତରଭା(ପ୍ରେରଣା ଖବର): ରାଜ୍ୟରେ ନୂତନ ବ୍ଲକପୁନଃର୍ଗଠନ ନେଇ ପଞ୍ଚାୟତିରାଜ ଓ ପାନୀୟଜଳ ବିଭାଗର ମନ୍ତ୍ରୀଙ୍କ ସୂଚନା ପରେ ବିଭିନ୍ନ ସ୍ଥାନରେ ନୂତନ ବ୍ଲକ ଗଠନ ନେଇ ଦାବି ଉଠିଛି । ସେହିକ୍ରମରେ ସୁବର୍ଣ୍ଣପୁର ଜିଲ୍ଲାର ସର୍ବପୁରାତନ ତଥା ବୃହତଗ୍ରାମ ଐତିହାସିକ ମେଣ୍ଡା ଗ୍ରାମପଞ୍ଚାୟତକୁ ବ୍ଲକ ଘୋଷଣା କରିବାକୁ ଦାବି ତେଜିଛି । ମେଣ୍ଡାକୁ ବ୍ଲକ ଘୋଷଣା କରିବା ଦାବି ଆଜିର ନୁହଁ । ଦୀର୍ଘ ୩୫ବର୍ଷ ହେଲା ମେଣ୍ଡା ଗଡତି ଅଞ୍ଚଳକୁ ନେଇ ଏକ ନୂତନ ବ୍ଲକଗଠନ କରିବାକୁ ସରକାରଙ୍କ ପାଖରେ ଦାବି ହୋଇ ଆସୁଛି । ଆଜି ମେଣ୍ଡା ଗୋପାଳଜୀ ମନ୍ଦିର ସମ୍ମୁଖରେ ଅଞ୍ଚଳବାସୀଙ୍କୁ ନେଇ ଏକ ସର୍ବସାଧାରଣ ବୈଠକ ଅନୁଷ୍ଠିତ ହୋଇଯାଇଛି । ସଂଗଠକ ଇଂ.ମୁକୁନ୍ଦ ସାହୁଙ୍କ ସଭାପତିତ୍ୱରେ ଅନୁଷ୍ଠିତ ବୈଠକରେ ଅଞ୍ଚଳର ବହୁସଂଖ୍ୟାରେ ଲୋକମାନେ ଯୋଗଦେଇ ବ୍ଲକଗଠନ ନେଇ ନିଜସ୍ୱ ମତ ଦେଇଥିଲେ । ଏଥିରେ ଐତିହାସିକ ଗ୍ରାମ ମେଣ୍ଡାରେ ବ୍ଲକ କରାଯିବାକୁ ପ୍ରସ୍ତାବ କରାଯାଇଛି । ଏହି ନୂତନ ବ୍ଲକରେ ମେଣ୍ଡା, ରାଣିସର୍ଡା, ଦେଉଳପଦର, ପାଇକବାହାଲ,ପୁଆ,ଜରାଜାରିଂ,ନାରାୟଣପୁର,ବଲାଡି,ଛକୋରମାଲ ଓ ଶିବତଳା ପଞ୍ଚାୟତକୁ ନେଇ ଗଠନ କରାଯିବାକୁ ପ୍ରସ୍ତାବ କରାଯାଇଛି । ଠିକ ସେହିପରି ପଞ୍ଚାୟତମାନଙ୍କର ଲୋକପ୍ରତିନିଧି ତଥା ଗ୍ରାମପଞ୍ଚାୟତର ସହମତି ନେବାକୁ ଆଗକୁ ସମସ୍ତଙ୍କୁ ଯୋଗାଯୋଗ କରାଯିବାକୁ ଏକ କୋର କମିଟି ଗଠନ କରାଯାଇଛି । ଏଥିରେ ସନାତନ କର୍ମିଙ୍କୁ ସଂଯୋଜକ ଭାବରେ ମନୋନିତ କରାଯାଇଥିବା ବେଳେ ସବ୍ୟସାଚୀ ଦଣ୍ଡସେନା,ବିଭୁତି ଝାଙ୍କର,ରାଜେନ୍ଦ୍ର ପଣ୍ଡା,କିଶୋର ପଣ୍ଡା,ବାଳଗୋପାଳ କର୍ମି,ଜିତେନ୍ଦ୍ରିୟ ପଣ୍ଡା,ଭୀକାରୀ ମେହେର,ସନ୍ତୋଷ ଦାସ,ବୃନ୍ଦାବନ ବାଦୀ,ତୀର୍ଥ ମହାକୁର, ଧନ୍ୟବାନ କଠାର,ହୃଷିକେଶ ପାତ୍ର,ଅନିରୁଦ୍ଧ ଟାଲି,ପ୍ରସାଦୀ କର୍ଣ୍ଣ,ଟଙ୍କଧର ମେହେର ପ୍ରମୁଖ ରହିଛନ୍ତି । ପ୍ରସ୍ତାବିତ ବ୍ଲକ ଅଞ୍ଚଳର ପଞ୍ଚାୟତ ପ୍ରତିନିଧି ଓ ଲୋକପ୍ରତିନିଧି ତଥା ବିଶିଷ୍ଟ ବ୍ୟକ୍ତି ବିଶେଷଙ୍କୁ ଏମାନେ ଭେଟି ଆଲୋଚନା କରିବେ । ମେଣ୍ଡାକୁ ବ୍ଲକ ଘୋଷଣା କରିବା ଦାବିକୁ ଲୋକାଭିମୁଖି କରିବାକୁ ଗଣମାଧ୍ୟମ ଓ ସାମାଜିକ ଗଣମାଧ୍ୟମର ବ୍ୟବହାର ଉପରେ ଗୁରୁତ୍ୱ ଦେବାକୁ ଯୁବକମାନେ ସାମିଲ ହେବାକୁ ଅନୁରୋଧ କରାଯାଇଛି । ଆସନ୍ତା ୨୨ ତାରିଖ ପର୍ଯ୍ୟନ୍ତ କୋର କମିଟି ଜନସଂମ୍ପର୍କ କରିବା ପରେ ଫେବୃୟାରୀ ୨୩ ତାରିଖରେ ଦ୍ୱିତୀୟ ବୈଠକ କରିବାକୁ ପ୍ରସ୍ତାବ କରାଯାଇଛି ।
    ପ୍ରକାଶ ଯେ,ସୋନପୁର ଗଡଜାତ ସମୟରୁ ମେଣ୍ଡା ଅଞ୍ଚଳ ଏକ ପ୍ରମୁଖ ଅଞ୍ଚଳ ହୋଇରହିଆସିଛି । ଗଡଜାତ ରାଜ୍ୟ ସମୟରେ ମେଣ୍ଡା ଏକ ଗଡଥିଲା ଓ ଏହାର ଗଡତ୍ୟାଙ୍କ ଅଧିନରେ ପ୍ରାୟ ୫୫ଟି ଗ୍ରାମ ରହିଥିଲା । ସେହି ସମୟରେ ମେଣ୍ଡାରେ ରାଜାଙ୍କ ଧାନଘର ସହ ଆଇନଶୃଙ୍ଖଳା ରକ୍ଷା ପାଇଁ ଏକ ଥାନା ରହିଥିଲା । କିନ୍ତୁ ସ୍ୱାଧିନତା ପରେ ଏହି ଅଞ୍ଚଳକୁ ଅବହେଳିତ କରି ରଖାଗଲା । କିନ୍ତୁ ତଥାପି ଅଞ୍ଚଳର ଲୋକଙ୍କ ଉଦ୍ୟମରେ ଏହି ଅଞ୍ଚଳରେ ଶିକ୍ଷାର ପ୍ରସାର ପାଇଁ ହାଇସ୍କୁଲ ଠାରୁ ଆରମ୍ଭ କରି ଡିଗ୍ରୀ କଲେଜ ପର୍ଯ୍ୟନ୍ତ ଅନୁଷ୍ଠାନ ଖୋଲା ଯାଇ ପରିଛି । ସେହିପରି ଡାକ୍ତରଖାନା, ପଶୁ ଡାକ୍ତରଖାନା, ଫାଣ୍ଡି ଇତ୍ୟାଦି ଚାଲିଛି । ଶାସନ ବ୍ୟବସ୍ଥାକୁ ଦେଖିଲେ ଏବେ ତରଭା ବ୍ଲକଅଧିନରେ ରହିଛି । କିନ୍ତୁ ରାଣୀସର୍ଡାର ଶେଷ ଗାଁ କୁମୁଣ୍ଡେଠାରୁ ବ୍ଲକ କାର୍ଯ୍ୟାଳୟର ଦୂରତା ପ୍ରାୟ ୩୫ କିମି ରହିଛି । ମେଣ୍ଡାରୁ ମଧ୍ୟ ବ୍ଲକ କାର୍ଯ୍ୟାଳୟକୁ ୨୫କିମି ରହିଛି । ସରକାର ଦ୍ୱାର ମୁହଁରେ ପ୍ରଶାସନ କଥା କହୁଥିବା ବେଳେ ଏହି ଅଞ୍ଚଳର ଲୋକେ ସରକାରୀ କାର୍ଯ୍ୟ ପାଇଁ ୨୫ କିମି ଦୂରରେ ଥିବା ବ୍ଲକ କାର୍ଯ୍ୟାଳୟକୁ ଯାଇ ଖର୍ଚ୍ଚାନ୍ତ ହେଉଛନ୍ତି । ସେହି ଦୃଷ୍ଟିରୁ ଲୋକଙ୍କୁ ଉଚିତ ସେବା ଯୋଗାଇ ଦେବାକୁ ମେଣ୍ଡାଠାରେ ବ୍ଲକ କାର୍ଯ୍ୟାଳୟ କରିବାକୁ ଦାବି ହୋଇ ଆସୁଛି । ୯୦ ଦଶକରୁ ମେଣ୍ଡାକୁ ବ୍ଲକ ଘୋଷଣା କରିବାକୁ ଦାବି ହୋଇ ଆସୁଛି । ଏବେ ମୋହନ ସରକାର ନୂତନ ବ୍ଲକ ପୁନର୍ଗଠନ ପ୍ରକ୍ରୀୟାରେ ମେଣ୍ଡାକୁ ସାମିଲ କରିବାକୁ ଅଞ୍ଚଳବାସୀ ଦାବି କରୁଛନ୍ତି । ସମସ୍ତଙ୍କ ସମ୍ମତିରେ ଖୁବଶୀଘ୍ର  ବ୍ଲକପୁନର୍ଗଠନ ନେଇ ଏକ ଚିଠାପ୍ରସ୍ତାବ କରାଯାଇ ବ୍ଲକ ପ୍ରଶାସନ ଓ ଜିଲ୍ଲାପ୍ରଶାସନ ତଥା ରାଜ୍ୟସରକାରଙ୍କ ପାଖରେ ଦାବି ଉପସ୍ଥାପନ କରାଯିବ ବୋଲି ବୈଠକରେ ପ୍ରସ୍ତାବ କରାଯାଇଛି ।