14-Feb-2025

ବିନିକା(ହିମାଂଶୁ ଶେଖର ପୁଟେଲ)ପ୍ରେମ ସତ୍ୟ ଚିରନ୍ତନ ବୋଲି କେଉଁ ଆବାହନ କାଳରୁ ଶୁଣିବାକୁ ମିଳେ।ପୁରାଣ ଯୁଗରେ ରାଧା-କୃଷ୍ଣଙ୍କ ପ୍ରେମଲୀଳା ଆଜି ବି ଜନମାନସରେ ରହିଛି ।ଆଧୁନିକ ଯୁଗରେ ପ୍ରେମ କାହାଣୀର ବିଷୟ ବସ୍ତୁ ଦୂରଦର୍ଶନ ସହ ବିଭିନ୍ନ ଖବରକାଗଜରେ ପୃଷ୍ଟା ମଣ୍ଡନ କରୁଛି ।ବିଭିନ୍ନ ବର୍ଗର ଯୁବକ ଯୁବତୀ ଭିନ୍ନ ଭିନ୍ନ ଭାବରେ ପାଳନ କରୁଥିବା ପ୍ରେମ ଦିନଟିକୁ ସ୍ୱରଣ କରିବା ପାଇଁ ଫେବୃଆରୀ ୧୪ତାରିଖକୁ ଭାଲେଣ୍ଟାଇନ ଡେ ଅର୍ଥାତ ପ୍ରେମ ଦିବସ ରୂପେ ସମଗ୍ର ଦେଶରେ ପାଳନ ହେଉଥିବା ପରିଲକ୍ଷିତ ହେଉଛି।ଏହା କେମିତି ହେଲା ତାହା ଜାଣିବା ପାଇଁ କାହାର ଆଗ୍ରହ ନାହିଁ ।କିନ୍ତୁ ଏ ଦୁନିଆରେ ଯୁବ ପିଡି ଏହି ଦିନଟିକୁ ଉତ୍ସାହ ଉଦ୍ଦୀପନା ସ୍ନେହ,ମମତାରେ ବାନ୍ଧି ହୋଇ ପାଳନ କରୁଥିବା ଜଣାପଡିଛି ।ପୁଣି ଦିନେ ନୁହେଁ ଭାଲେଣ୍ଟାଇନକୁ ପାଳନ କରିବାକୁ ଯାଉଛନ୍ତି ଭାଲେଣ୍ଟାଇନ ୱିକ ଅର୍ଥାତ ପ୍ରେମ ସପ୍ତାହ ଭାବରେ ।ଏହାକୁ ପାଳନ ନେଇ ନିଜ ନିଜ ମନ ମଧ୍ୟରେ ଯୁବ ପୀଡି ପ୍ରସ୍ତୁତିକୁ ଜୋରଦାର କରିଦେଇଥିବା ଦେଖାଯାଉଛି । ଭାଲେନଟାଇନ୍ ଡେ କୁ ନେଇ ପଲ୍ଲୀ ଠାରୁ ସହର ଯାଏ ଯୁବକ ଯୁବତୀ ଚଳଚଞ୍ଚଳ ହୋଇପଡିଛନ୍ତି । ଭାଲେନଟାଇନ୍ ଡେ ରେ କିଏ କାହାକୁ କଣ ଉପହାର ଦେବ ସେ ନେଇ ଚାଲିଛି ପ୍ରତିଯୋଗିତା ।ବିଭିନ୍ନ ସ୍ଥାନରେ ଖୋଲାଯାଇଥିବା ଦୋକାନରେ ବ୍ୟବସାୟୀମାନେ ମନପସନ୍ଦ ସାମଗ୍ରୀ ବିକ୍ରୟ ପାଇଁ ସଜ୍ଜିତ କରିଛନ୍ତି ।ସ୍ଵତନ୍ତ୍ର ଉପହାର,ଆକର୍ଷଣୀୟ କାର୍ଡ,ଲଭମେଟେରିଏଲସ । ନିଜ ପ୍ରେମିକ ପ୍ରେମିକାଙ୍କ ପାଇଁ ମନ ପସନ୍ଦ ଉପହାର କେମିତି ରହିବ ତାହା କିଣିବା ନେଇ ଦୋକାନ ଗୁଡ଼ିକରେ ଭିଡ଼ ଜମୁଛି। ଭାଲେନଟାଇନ ଡେ କୁ ପାଳନ କରୁଥିବା ଯୁବ ପିଢୀ ଙ୍କ ଉତ୍ସାହିତ ମନ ଯେପରି ନ ଭାଙ୍ଗେ ସେଥିପାଇଁ ତାଙ୍କ ଚାହିଦା ସକାଶେ ଆକର୍ଷଣୀୟ ଡିଜାଇନର କୋଟେସନ କାର୍ଡ,ଚକଲେଟ,କ୍ୟାଣ୍ଡେଲ ଆଦି ବିକ୍ରୟ ହେଉଥିବା ମଧ୍ୟ ଦେଖାଯାଇଛି ।କେତେକ ପୁଅ ଝିଅ ନିଜର ପିତା ମାତାଙ୍କ ଭୟରେ ଓ ତାଙ୍କ ଅଜାଣତରେ ଲୁଚାଛପା ଟଙ୍କା ଖର୍ଚ୍ଚ ନକରି ବିଭିନ୍ନ ପ୍ରକାରର ଫୁଲ ତୋଡା ତିଆରି କରି ଉପହାର ଦେବାପାଇଁ ପ୍ରସ୍ତୁତ ହୋଇସାରିଛନ୍ତି ।ବିଶେଷ କରି ଗୋଲାପ ଫୁଲର ଚାହିଦା ବୃଦ୍ଧି ପାଇଛି।ଯେଣେତେଣେ ପ୍ରକାରରେ ଗୋଲାପ ଫୁଲ ସଂଗ୍ରହ କରିବାରେ ଲାଗି ପଡ଼ିଛନ୍ତି ପ୍ରେମିକ ପ୍ରେମିକା ।ସ୍ନେହ ମମତାରେ ବାନ୍ଧି ରଖିବା ପାଇଁ ତପ୍ତର ଆଜିର ଯୁବ ପିଢୀ ଭାଲେନଟାଇନ୍ ଡେ କୁ ମନରେ ହସ ଭରି ପାଳନ କରିବ ସେନେଇ ଆଶା ରଖିଛି ।ଅନ୍ୟ ପକ୍ଷରେ ବିନିକା ଅଞ୍ଚଳରେ ଅବସର ବିନୋଦନ ପାଇଁ ସେଭଳି ପ୍ରକୃଷ୍ଟ ସ୍ଥାନ ଅର୍ଥାତ ପାର୍କ ଟିଏ ନଥିବାରୁ ଯୁବ ପିଢୀ ମହଲରେ ହତାଶ ଭାବ ଦେଖାଯାଇଛି।ତେବେ ସେ ଯାହା ବି ହେଉ ବିନିକାର ଐତିହାସିକ ପୁଣ୍ୟପୀଠ ପାପକ୍ଷୟ,ସବୁଜ ବନାନୀରେ ଭରପୁର ଘଣ୍ଟାସିନୀ ପାହାଡ଼,ମାଁ ଘଣ୍ଟେଶ୍ୱରୀ ପୀଠ,ବାଇକାନି ପୀଠ ପ୍ରଭୃତି ସ୍ଥାନ ଏମାନଙ୍କ ପାଇଁ ସାଖୀ।ବର୍ତ୍ତମାନ ଯୁଗରେ ନାରୀ ନିର୍ଯାତନା,ଦୁଷ୍କର୍ମ,ଅତ୍ୟାଚାର,ଗଣ ବଳାତ୍କାର ଯେଭଳି ଭାବରେ ବୃଦ୍ଧି ପାଉଛି ତାକୁ ପ୍ରତିହତ କରିବା ପାଇଁ କେତେକ ସଚେତନ ବ୍ୟକ୍ତି ଓ ବିଭିନ୍ନ ସଂଗଠନ ଏହାର ତୀବ୍ର ବିରୋଧ କରୁଛନ୍ତି ।ଏହି ଦିବସକୁ ମାତୃ-ପିତୃ ପୂଜନ ଦିବସ କିମ୍ବା ପରିବାରର ସମସ୍ତ ସଦସ୍ୟ ଏକାଠି ରହି ନିଜ ନିଜ ଭିତରେ ସ୍ନେହ, ଶ୍ରଦ୍ଧା,ମମତା,ନିବିଡ଼ ସମ୍ପର୍କ ସୃଷ୍ଟିକରି ସମ୍ମାନର ସହ ପାଳନ କରିବା ଉଚିତ ବୋଲି ମତ ପ୍ରକାଶ ପାଇଛି।