04-Jan-2025

ବରପାଲି(ସୁଦାମ ଦୀପ): ବରଗଡ଼ କେନାଲ ବିଭାଜନ ପକ୍ଷରୁ ଜିଲ୍ଲା ସ୍ତରୀୟ ପାଣି ପଂଚାୟତ ପକ୍ଷ ପାଳନ କରାଯାଇଛି। କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ବରଗଡ଼ ସାଂସଦ ପ୍ରଦୀପ ପୁରୋହିତ ଯୋଗଦେଇ ଚାଷ ଓ ଚାଷୀଙ୍କ ସର୍ବାଙ୍ଗୀନ ଉନ୍ନତି ପାଇଁ ଓଡ଼ିଶା ସରକାର ନେଇଥିବା ପଦକ୍ଷେପକୁ ସ୍ବାଗତ କରି ପାଣି ପଂଚାୟତ ବୈଠକରେ ଦିନକୁ ଦିନ ଚାଷୀଙ୍କ ସଂଖ୍ୟା ହ୍ରାସ ପାଇବାରେ ଲାଗିଥିବାରୁ ଏହାର ସୁଧାର ନିମନ୍ତେ ବିଭାଗୀୟ ଅଧିକାରୀମାନଙ୍କୁ ପଦକ୍ଷେପ ପାଇଁ ତାଗିଦ କରିଥିଲେ । ସମ୍ମାନୀତ ଅତିଥି ଭାବରେ ବରଗଡ଼ ବିଧାୟକ ଅଶ୍ବିନୀ ଷଢ଼ଙ୍ଗୀ ପାଣି ପଞ୍ଚାୟତ ଗଠନର ଆବଶ୍ୟକତା ଓ ଏ ହାର ଉପାଦେୟତା ବିଷୟରେ ଉପସ୍ଥାପନ କରି ଚାଷୀଙ୍କୁ ଏହାର ଲାଭ ଉଠାଇବା ପାଇଁ ଆହ୍ବାନ ଦେଇଥିଲେ । ଅନ୍ୟତମ ସମ୍ମାନିତ ଅତିଥି ଭାବରେ ଅତାବିରା ବିଧାୟକ ଚାଷୀଙ୍କ ହିତରେ ଗଠିତ ପାଣି ପଂଚାୟତଗୁଡ଼ିକୁ ଆହୁରି ତତ୍ପର ହେବା ପାଇଁ ଆହ୍ବାନ କରିଥିଲେ l 
 ପାଣି ପଂଚାୟତ ନୋଡ଼ାଲ ଅଫିସର ଇରିଗେସନ ବିଭାଗର ଅତିରିକ୍ତ ମୁଖ୍ୟ ଯନ୍ତ୍ରୀ ଇଂ.ବସନ୍ତ କୁମାର ସାହୁ ନିଜର ସଭାପତିତ୍ବ ଅଭିଭାଷଣ ରଖୀ ପାଣି ପଂଚାୟତ ପକ୍ଷରେ ସାମିଲ ହୋଇ ଉପକୃତ ହେବାକୁ ଚାଷୀଙ୍କୁ ଆହ୍ବାନ ଦେଇଥିଲେ । ମଂଚାସୀନ ଉଠା ଜଳସେଚନ ନିଗମର ନିର୍ବାହୀ ଯନ୍ତ୍ରୀ ଇଂ. ସୂର୍ଯ୍ୟନାରାୟଣ ତ୍ରିପାଠୀ ଜଳସେଚନକୁ ନେଇ ଚାଷୀମାନେ ଭୋଗୁଥ‌ିବା ସମସ୍ୟା ଉପରେ ଆଲୋକପାତ କରି ପାଣି ପଞ୍ଚାୟତ ହିଁ ବିକଳ୍ପ ବୋଲି ମତବ୍ୟକ୍ତ କରିଥିଲେ ।   ଏ ଅବସରରେ ପୂର୍ବରୁ ଛାତ୍ରଛାତ୍ରୀଙ୍କ ମଧ୍ୟରେ ହୋଇଥିବା ବିଭିନ୍ନ ପ୍ରତିଯୋଗୀତାର କୃତୀ ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା । ସଭାକୁ ସ୍ୱପ୍ନାରାଣୀ ସାହୁ ସଂଚାଳନ କରିଥିବା ବେଳେ ବିଭାଗୀୟ ନିର୍ବାହୀ ଯନ୍ତ୍ରୀ ଇଂ. ମଦନମୋହନ ସେଠୀ ସ୍ବାଗତ ଅଭିଭାଷଣ ଦେଇଥିଲେ ଏବଂ ବରପାଲି ଏ ସର୍ତ୍ତ ଓ ଇଂ.ଘନଶ୍ୟାମ ସେଠ ଧନ୍ୟବାଦ ଅର୍ପଣ କରିଥିଲେ ।