06-Sep-2024

ବରଗଡ଼:(ନିରଞ୍ଜନ ତ୍ରିପାଠୀ)-ପାଖେଇ ଆସିଲା ପଶ୍ଚିମ ଓଡିଶାର ମହାନ ଗଣପର୍ବ ନୂଆଁଖାଇ। ନୂଆଁଖାଇ ପର୍ବ ରେ ସମସ୍ତେ ନୂତନ ବସ୍ତ୍ର ପରିଧାନ ସହିତ ନୂଆଁ ଧାନର ଅନ୍ନ,ପିଠା ପଣା କରି ଆରାଧ୍ୟ ଦେବୀ ମାଁ ସମଲେଶ୍ଵରୀଙ୍କ ଠାରେ ଭୋଗ କଲାପରେ ନିଜ ପରିବାର ବର୍ଗଙ୍କ ସହ ହସ ମଉଜରେ ଦିନଟି କରାଇଥାନ୍ତି । ତାପରେ ଆରମ୍ଭ ହୁଏ ଜୁହାର ଭେଟ କାର୍ଯ୍ୟକ୍ରମ ।କିନ୍ତୁ ନିଜ ପରିବାର ବର୍ଗଙ୍କ ପାଇଁ ଅଲୋଡା ହୋଇ ବରଗଡ଼ ବ୍ଲକ ଅନ୍ତର୍ଗତ ଚକରକେନ୍ଦ ଠାରେ ଥିବା ମାତୃଛାୟା ତପୋବନ ଆଶ୍ରମ ରେ ରହୁଥିବା  ଅନ୍ତେବାସୀ ମାନଙ୍କ ହୃଦୟ ଓ ମନର ଦୁଃଖକୁ ହୃଦୟଙ୍ଗମ କରି ବରଗଡ଼ ସ୍ଥିତ ସ୍ୱୟଂ ପ୍ରଭା ସାହିତ୍ୟ ସଂସଦ ର ସଦସ୍ୟା ମାନେ ନୂଆଁଖାଇ ପୂର୍ବରୁ ଅନ୍ତେବାସୀଙ୍କ ପାଇଁ ନୂଆ ସମ୍ବଲପୁରୀ ଶାଢ଼ୀ ଓ ଧୋତି ଗାମୁଛା  ପ୍ରଦାନ କରି ଏକ ଅନନ୍ୟ ଉଦାହରଣ ସୃଷ୍ଟି କରିଛନ୍ତି ।ଆଶ୍ରମରେ ରହୁଥିବା ପ୍ରତିଟି ମାଆ ଙ୍କ ପାଇଁ ଖଣ୍ଡିଏ ଲେଖାଏଁ ନୂଆ ସମ୍ବଲପୁରୀ ଶାଢ଼ୀ ଓ ବରିଷ୍ଠ ନାଗରିକଙ୍କ ପାଇଁ ଧୋତି ଗାମୁଛା ପ୍ରଦାନ କରିଛନ୍ତି ।ନୂଆଁଖାଇ ପାଳନ ପୂର୍ବରୁ ଖଣ୍ଡିଏ ଲେଖାଏଁ ନୂଆ ଶାଢ଼ୀ ପାଇବା ପରେ ନିଜକୁ  ଅସହାୟ ମନେ କରୁଥିବା ଏ ମାଆ ଓ ବାପା ମାନଙ୍କ ମୁହଁରେ ହସ ଫୁଟାଇବା ସହିତ ସେମାନେ ସମାଜରେ ଏକା ନୁହନ୍ତି ତାଙ୍କ ସହିତ ସମାଜ ରହିଛି ଏକଥା ହୃଦୟଙ୍ଗମ କରିଥିବା ଅନ୍ତେବାସୀ ପ୍ରକାଶ କରିଥିଲେ ।ସାହିତ୍ୟ ସଂସଦର ଏହି ଛୋଟିଆ  ପ୍ରୟାସ ନିବିଡ ସମ୍ପର୍କ ଓ ଭାଇ ଚାରାର ପର୍ବ ନୂଆଁଖାଇ ଏହା ପ୍ରମାଣିତ ହୋଇଥିବାବେଳେ ସାହିତ୍ୟ ସଂସଦର ଏହି କାର୍ଯ୍ୟ ଜନ ସାଧାରଣରେ ପ୍ରଶଂସନୀୟ ହୋଇଛି ।  ସାହିତ୍ୟ ସଂସଦର ସମ୍ପାଦିକା କମଳିନୀ ଦେବୀଙ୍କ ନେତୃତ୍ବରେ ପବିତ୍ର ଗୁରୁ ଦିବସ ଅବସରରେ ବରିଷ୍ଠ ସଦସ୍ୟା ଦିବ୍ୟ କାନ୍ତି ଭୋଇ,ମୀନା ପଣ୍ଡା,କବିତା ଦେବତା,ସନ୍ତୋଷିନୀ ଦାଶ,ରାଧାରାଣୀ ପଟ୍ଟନାୟକ,ଗୀତା ଉଦଗାତା ,ବିଜୟା ରାଣୀ ମିଶ୍ର,ରୀତା ମିଶ୍ର,ଜ୍ୟୋସ୍ନା ଦାଶ ପ୍ରମୁଖ ଆଶ୍ରମ କୁ ଯାଇ ଅନ୍ତେବାସୀଙ୍କ ସହ ଭାବ ବିନିମୟ କରି ସମସ୍ତଙ୍କୁ ନୂତନ ସମ୍ବଲପୁରୀ ଶାଢ଼ୀ ପ୍ରଦାନ କରିବା ସହିତ ଆଗାମୀ ଦିନରେ ଅନ୍ୟାନ୍ୟ ସୁବିଧା ଅସୁବିଧା ବି ଯଥା ସମ୍ଭବ ପୁରଣ କରିବା ପାଇଁ ସାହିତ୍ୟ ସଂସଦର ସଦସ୍ୟା ଗଣ ସଂକଳ୍ପ ନେଇଛନ୍ତି ।