26-Aug-2024

ନୂଆପଡ଼ା  (ରାମନାଥ ପଣ୍ଡା)
ଓଡ଼ିଶା ସରକାରଙ୍କ ଉଚ୍ଚ ଶିକ୍ଷା ବିଭାଗ,ମାଁ ମାଣିକେଶ୍ଵରୀ ବିଶ୍ଵବିଦ୍ୟାଳୟ ଓ ବିଜୁ ପଟ୍ଟନାୟକ ସ୍ନାତକ ମହାବିଦ୍ୟାଳୟ ବୋଡ଼େନ ଠାରେ ଅନୁଷ୍ଠିତ ଜାତୀୟ ସେବା ସଂସ୍ଥାର ତ୍ରିଦିବସୀୟ ଜିଲ୍ଲା ସ୍ତରୀୟ ଯୁବ ନେତୃତ୍ବ ବିକାଶ ତାଲିମ ଶିବିର ଉଦଯାପିତ ହୋଇଯାଇଛି।କାର୍ଯ୍ୟକ୍ରମ ଅଧିକାରୀ ଡଃ କିଶୋର କୁମାର କର୍ଣ୍ଣଙ୍କ ପରିଚାଳନାରେ ଅନୁଷ୍ଠିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ବୋଡ଼େନ ଥାନା ଅଧିକାରୀ ଗୋବିନ୍ଦ ଚନ୍ଦ୍ର ମାଝୀ, ସମ୍ମାନିତ ଅତିଥି ରୂପେ ପରିଚାଳନା ପରିଷଦ ସଭାପତି ରାଜା ରାମ କଟା,ଜିଲ୍ଲା କାର୍ଯ୍ୟକ୍ରମ ଅଧିକାରୀ ପ୍ରଣତି ପଣ୍ଡା,ଅଧ୍ୟାପକ ସନ୍ତୋଷ କୁମାର ମୁଣ୍ଡ ପ୍ରମୁଖ ମଞ୍ଚାଷିନ ଥିଲେ ।ଶିବିରରେ କଳାହାଣ୍ଡି ଓ ନୂଆପଡା ଜିଲ୍ଲାର ୧୦୦ ଜଣ ସ୍ବେଚ୍ଛାସେବୀ ଏବଂ ୧୦ ଜଣ କାର୍ଯ୍ୟକ୍ରମ ଅଧିକାରୀ ଯୋଗଦାନ କରି ଶିବିରର ମାନ ବଢାଇ ଥିଲେ ।ଏହି ଶିବିରରେ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଥିଲା ।ନୂଆପଡ଼ା ଆର୍ ଟି ଓ ମନ ସିଂ ସିଦ୍ଧାନ୍ତ ମହାପାତ୍ର ,ଅବକାରୀ ବିଭାଗ ଇନ୍ସପେକ୍ଟର ପ୍ରମୁଖ ଯୋଗଦାନ କରି ସ୍ବେଚ୍ଛାସେବୀ ମାନଙ୍କୁ ଉତ୍ସାହିତ କରିଥିଲେ ।କାର୍ଯ୍ୟକ୍ରମରେ ଛାତ୍ର ଛାତ୍ରୀ ମାନଙ୍କ ମଧ୍ୟରେ ପାଞ୍ଚୋଟି ବର୍ଗରେ ନୃତ୍ୟ,ଗୀତ,ଦଳଗତ ନୃତ୍ୟ, ରଙ୍ଗୋଳି ଓ ସାଧାରଣ ଜ୍ଞାନର ପ୍ରତିଯୋଗିତା ଅନୁଷ୍ଠିତ ହୋଇଥିଲା ।ଦଳଗତ ନୃତ୍ୟ ବର୍ଗରେ ସିନାପାଲି ମହାବିଦ୍ୟାଳୟ ପ୍ରଥମ ସ୍ଥାନ , ବିଜୁ ପଟ୍ଟନାୟକ ମହାବିଦ୍ୟାଳୟ ବୋଡ଼େନ ଦ୍ଵିତୀୟ ସ୍ଥାନ ଓ ପଞ୍ଚାୟତ ସମିତି ମହାବିଦ୍ୟାଳୟ କୋମନା ତୃତୀୟ ସ୍ଥାନ ଅଧିକାର କରିଥିଲେ। ମାଁ ମାଣିକେଶ୍ଵରୀ ବିଶ୍ଵବିଦ୍ୟାଳୟର ଅବିନାଶ ମହାପାତ୍ର ଓ ବିଜୁ ପଟ୍ଟନାୟକ ମହାବିଦ୍ୟାଳୟର ଯୁଧିଷ୍ଠିର ଦଣ୍ଡସେନା ଶ୍ରେଷ୍ଠ ସ୍ବେଚ୍ଛାସେବୀ ଭାବରେ ପୁରସ୍କୃତ ହୋଇଥିବାବେଳେ ଶ୍ରେଷ୍ଠ ମହିଳା ସ୍ବେଚ୍ଛାସେବୀ ରୂପେ ପଦ୍ମ ମାଝୀ ଓ ରଶ୍ମିତା ଜଗତ ପୁରସ୍କୃତ ହୋଇଛନ୍ତି ।