23-Aug-2024

ବରଗଡ(ନିରଞ୍ଜନ ତ୍ରିପାଠୀ)-ପଶ୍ଚିମ ଓଡ଼ିଶାର ଗଣପର୍ବ ହେଉଛି ନୁଆଁଖାଇ। ନିଜ ଘରର ଲୋକ ହୁଅନ୍ତୁ ଅଥବା ଗ୍ରାମର ଯିଏ ଯେଉଁଠି ବି ଥାଉ ନା କାହିଁକି ଏହି ମହାନ ଗଣପର୍ବକୁ ପାଳନ ତଥା ଉପଭୋଗ ପରିପ୍ରେକ୍ଷୀରେ ଦେଶ ବିଦେଶରୁ ନିଜ ମାତୃଭୂମିକୁ ଛୁଟି ଆସିଥାନ୍ତି । ଘରର ସମସ୍ତେ ମିଶି ଦେବା ଦେବୀ ତଥା ପୂର୍ବପୁରୁଷ ମାନଙ୍କ ନିକଟରେ ବିଧିବଦ୍ଧ ଭାବରେ ପୂଜାର୍ଚ୍ଚନା କରି ପ୍ରଥମେ ଠାକୁରଙ୍କ ଠାରେ ନବାନ୍ନ ଭୋଗ ଅର୍ପଣ କରି ପରିବାରର ସମସ୍ତେ ମିଶି ଗୋଟିଏ ଜାଗାରେ ବସି ନବାନ୍ନ ଭକ୍ଷଣ କରିଥାନ୍ତି । ପଶ୍ଚିମ ଓଡ଼ିଶାରେ ଏମିତି ଅନେକ ଗ୍ରାମ ଅଛି ଯେଉଁଠାରେ କି ଗ୍ରାମବାସୀ ସମସ୍ତେ ଏକତ୍ରିତ ହୋଇ ଅତି ଆନନ୍ଦ ଓ ଶ୍ରଦ୍ଧାର ସହିତ ନବାନ୍ନ ଭକ୍ଷଣ କରନ୍ତି।ପଶ୍ଚିମ ଓଡ଼ିଶାର ପ୍ରସିଦ୍ଧ ଓ ପବିତ୍ର ତୀର୍ଥ କ୍ଷେତ୍ର ଶ୍ରୀଶ୍ରୀ ନୃସିଂହନାଥ ପୀଠରେ ବିରାଜମାନ ମହାପ୍ରଭୁ ମାର୍ଜ୍ୟାରକେଶରୀ ଙ୍କ  ନିକଟରେ ନବାନ୍ନ ଭୋଗ ଅର୍ପଣ କରିବା ପାଇଁ ତା ୨୩.୦୮.୨୦୨୪ରିଖ ଶ୍ରୀ ଶ୍ରୀ ନୃସିଂହନାଥ ମନ୍ଦିର ପରିସରରେ ସ୍ଥାନୀୟ ପଣ୍ଡିତ ମହାସଭା ଓ ନୃସିଂହନାଥ ପ୍ରଶାସନ ଦ୍ୱାରା ଲଗ୍ନ ଧାର୍ଯ୍ୟ କରାଯାଇଛି । କୁଳ ପୁରୋହିତ ଶ୍ରୀମାନ ସୁନୀଲ ପୁରୋହିତ ଓ ଶ୍ରୀଶ୍ରୀ ନୃସିଂହନାଥ ମନ୍ଦିର ଟ୍ରଷ୍ଟ ବୋର୍ଡର କାର୍ଯ୍ୟନିର୍ବାହୀ ଅଧିକାରୀ ଶ୍ରୀମାନ ପୁରୁଷୋତ୍ତମ ପ୍ରଧାନଙ୍କ ସୂଚନା ମୁତାବକ ଆସନ୍ତା ସେପ୍ଟେମ୍ବର ମାସ ଆଠ ତାରିଖ ରବିବାର ଦିନ ସକାଳ ନଅ ଘଣ୍ଟା ନଅ ମିନିଟ ତେତିଶ

ସେକେଣ୍ଡରୁ ନଅ ଘଣ୍ଟା ଚବିଶ ମିନିଟ ଅଠର ସେକେଣ୍ଡ ମଧ୍ୟରେ ରୀତିନୀତି ଅନୁଯାୟୀ ମହାପ୍ରଭୁ ଓ ପାର୍ଶ୍ୱ ଦେବାଦେବୀ ମାନଙ୍କ ନିକଟରେ ନବାନ୍ନ ଅର୍ପଣ କରାଯିବ । ଆଜି ନବାନ୍ନ ଲଗ୍ନ ଧାର୍ଯ୍ୟ ଅବସରରେ ଆୟୋଜିତ ବୈଠକରେ ଶ୍ରୀଶ୍ରୀ ନୃସିଂହନାଥ ବ୍ରାହ୍ମଣ ସମାଜର ସଭାପତି ଗିରିଶ ଚନ୍ଦ୍ର ନାୟକ,ମାତୃ ପ୍ରସାଦ ରଥ,ଡିଗ୍ରୀଧର ଦେବତା,ରଙ୍କମଣି ଦେବତା,ପ୍ରେମାନନ୍ଦ ଦେବତା,ସତ୍ୟଭୂଷଣ ପୁରୋହିତ,ନୃସିଂହ ହୋତା,ସୁଜ୍ଞାନ୍ତ ତ୍ରିପାଠୀ ଓ ସୁବୋଧ ପଣ୍ଡା ପ୍ରମୁଖ ଉପସ୍ଥିତ ଥିଲେ ।